Bólakisa bana na bino kopesa biyano na makita

PERLA, mwasi moko ya ekólo Mexique, alobaki ete ntango azalaki mwana moke, mama na ye azalaki kosalisa ye na kobongisa biyano ya mikuse oyo akopesa na boyekoli ya Linɔ́ngi ya Mosɛnzɛli. Lelo oyo, Perla azali na mwana mobali moko ya mbula mitano. Ndenge nini asalisaka ye? Alobi boye: “Nabongisaka naino boyekoli ngai moko. Soki nasilisi, nalukaka paragrafe oyo mwana na ngai akoki kokanga ntina na yango malamu, oyo akoki kolimbola na maloba na ye moko. Na nsima, totalelaka paragrafe yango malamumalamu; mpe abengaka yango paragrafe na ye. Nasɛngaka ye apesa bandakisa mpo na kolimbola paragrafe yango. Nsima na yango, tomekaka eyano yango mbala mingi. Nasimbisaka ye eloko moko lokola mikro mpo ayeba kosimba mikro ntango azali kopesa eyano. Nazali na esengo mpamba te, alekisaka ata likita moko te kozanga kopesa eyano to kotombola mosapi. Mbala mingi, asololaka na motambwisi ya Linɔ́ngi ya Mosɛnzɛli liboso makita ebanda mpo na koyebisa ye paragrafe na ye.”

Jens, nkulutu moko oyo asanganaka na etuluku ya monɔkɔ ya Hindi, azali na bana mibali mibale; moko azali na mbula minei, mosusu azali na mbula mibale. Ntango azali kobongisa makita na libota na ye, Jens asalaka ndenge baboti na ye bazalaki kosala. Alobi boye: “Tolukaka eteni oyo bana bakoki kokanga ntina malamu. Na nsima, tolimbolelaka bango lisolo mobimba na mokuse to toyebisaka bango makanisi ya ntina ya lisolo yango, mpe totunaka bango mituna oyo tolingi ete báyanola na makita. Mbala mingi, tokamwaka mpenza na koyoka biyano ya malamu oyo bapesaka na maloba na bango moko. Biyano oyo bapesaka emonisaka ete bakangi ntina ya likambo yango. Na bongo, biyano na bango esanzolaka Yehova mpe emonisaka kondima na bango.”