Ozali komikundola?

Osepelaki mpenza na botángi ya banimero ya Linɔ́ngi ya Mosɛnzɛli oyo euti kobima? Na bongo, talá soki okoki kopesa biyano na mituna milandi:

• Nini ekoki kosalisa yo ntango ndeko moko ya libota atiki Yehova?

Osengeli kosala makasi mpo yo moko mpe bato mosusu ya libota na yo bózala makasi na elimo. Mipesá na misala ya elimo. Mipesá mpo na kosunga basusu. Kobungisa elikya te ete ndeko na yo akozonga na lisangá. Komona te ete omemi ngambo. Koloba mabe te mpo na disipilini ya Nzambe, mpe yebisá baninga na yo ya motema makanisi oyo ezali kotungisa yo.​—1/9, nkasa 18-21.

• Tángá lolenge mibale oyo Biblia ezali kosalisa biso tóyeba ete tozali na “mikolo ya nsuka”?

Biblia esakolaki makambo oyo ekomonana na “bosukisi ya ebongiseli ya makambo ya ntango oyo.” (Matai 24:3, 7, 8; Luka 21:11) Elobelaki mpe mbongwana oyo ekomonana na makanisi mpe bizaleli ya bato oyo bakozala na bomoi na “mikolo ya nsuka.” (2 Timote 3:1-5) Elobaki ete nsango malamu ya bokonzi ekosakolama na ntango yango.​—15/9, nkasa 4-6.

• Lisangá esengeli kosala nini soki moklisto moko oyo azali kotambwisa motuka asali likama oyo ebomi bato?

Bankulutu oyo bazali kotalela likambo yango bakoki komona ete azali na nyongo ya makila te mpamba te akokaki mpenza kosala eloko te na likambo oyo esalemi. Kasi, soki emonani ete ndeko yango azali na nyongo ya makila mpe abongoli motema, bakopesa ye mpamela oyo esengeli mpe bakopekisa ye kosala mikumba mosusu na kati ya lisangá.​—15/9, lokasa 30.

• Mpo na nini tolobi ete moto akozwa bomoi ya seko na nzela ya mayele ya siansi te?

Bato ya mayele bazali kosala milende mpo na kokómisa bomoi ya moto molai, na ndakisa bazali koluka ndenge ya kosala ete baselile ya moto etika te kobotana mpe soki enama moko ya nzoto ya moto ebebi, bazali kosalela mayele ya sika oyo babengi clonage thérapeutique mpo na kopesa ye enama mosusu. Kasi, Biblia ezali komonisa ete ezali kaka na nzela ya lisiko ya Yesu nde bato bakoki kozwa bomoi ya seko.​—1/10, nkasa 3-5.

• Molulu ya kosukola ya Bayuda ezalaki nde ebandeli ya batisimo oyo baklisto bazwaka?

Ezalaki ebandeli ya batisimo ya baklisto te. Bayuda bazalaki kosala molulu ya kosukola mpo na komipɛtola; kasi, batisimo ya Yoane ezalaki bongo te. Molulu ya komipɛtola oyo esɛngisamaki na Mibeko ya Moize ezalaki kosalema mbala na mbala, nzokande moklisto azwaka batisimo kaka mbala moko.​—15/10, nkasa 12-13.

• Eteyelo mpo na kobongisa basungi ezali nini?

Ezali mateya oyo bankulutu mpe basaleli na misala oyo bazali minzemba balandaka na boumeli ya pɔsɔ mwambe; mpe na nsima, batindamaka na bisika oyo mposa ezali makasi; ekoki kozala na lisangá epai bautaki, to na lisangá mosusu kaka na mboka na bango to mpe na mboka mopaya.​—15/11, nkasa 10-11.

• Motɛmɛli ya Klisto oyo 1 Yoane 2:18; 4:3 elobeli ezali nani?

“Motɛmɛli ya Klisto” ezali bato nyonso oyo batɛmɛlaka Klisto to balobaka ete bango nde Klisto to bamonisi na ye. Maloba ya Yesu mpe ya Yoane emonisi ete motɛmɛli ya Klisto azali moto moko te, kasi ezali bato ebele oyo bazali kopalanganisa mateya ya lokuta mpe bazali koboya Bokonzi ya Nzambe.​—1/12, nkasa 4-6.