Nini epesaka ntina na bomoi na yo?

KENNY azalaki kosala na kompanyi moko monene, azalaki na motuka ya ntalo mpe azalaki kofanda na ndako moko monene na kartye ya bato ya mbongo. Azalaki kosepela na lisano ya kokita na parachute mpe ayebaki kosala yango malamu. Mobali yango azalaki na bomoi ya esengo? Na zulunalo moko (The Wall Street Journal), ye moko alobaki boye: “Lelo oyo nakómi na mbula 45, kasi nazali na elikya moko te . . . Bomoi na ngai ezali na ntina moko te.”

Elyn amipesaki mpenza mpo na koyekola lisano ya koselumwa na glasi (patinage). Nsukansuka, ayebaki malamu lisano yango. Elyn azwaki lokumu oyo azalaki koluka. Kasi, alobaki boye: “Wapi esengo oyo nakanisaki kozala na yango? Namiyokaka ete nazali kaka ngai moko. Nsima ya mwa bambula nakokóma mobange; atako nazali na mbongo mingi, bomoi na ngai ekozala na ntina te soki esuki kaka na makambo oyo.”

Hideo ayebaki mpenza kosala mayemi mpe amipesaki na mosala yango. Azalaki kotɛka mayemi na ye te; azalaki komona ete soki akómi kotɛka yango, akoluka lisusu kobongisa yango malamumalamu te. Ntango akómaki na mbula 98, apesaki mayemi na ye mingi mpo bátya yango na ndako moko ya kobomba biloko ya kala (musée). Amipesaki na kosala mayemi bomoi na ye mobimba. Atako bongo, azalaki na esengo te; alobaki ete bomoi na ye ezalaki mokuse mpo ayeba kosala mayemi ya malamu koleka.

Bato mosusu bamipesaka na kosalisa basusu. Tózwa ndakisa ya mobali moko oyo azalaki kosala bafilme. Mobali yango azalaki mokonzi na kompanyi moko monene oyo ebimisaka bafilme na États-Unis; ayebanaki na bato minene mpe azalaki kofanda na kartye ya bato ya mbongo. Mokolo mosusu akendaki na ekólo Cambodge; ntango azalaki kolya na restora moko na Phnom Penh, mwana moko ya mwasi ayaki kosɛnga ye mbongo. Akabelaki ye dolare moko ná masanga ya sukali. Mwana yango asepelaki mingi. Kasi, na mokolo oyo elandaki, amonaki lisusu mwana yango, azali kaka kosɛngasɛnga. Mobali yango amonaki ete mpo na kosalisa mpenza mwana yango, asengeli kosuka kaka te na kokabela ye mwa mbongo.

Na mbula oyo elandaki, mobali yango atikaki mosala ya kobimisa bafilme mpe akómaki kosalisa babola na Cambodge. Afungolaki eteyelo mpo na kotangisa bana, kopesa bango bilei mpe bisika ya kolala. Atako bongo, mobali yango azalaki kaka na esengo te. Azalaki kosepela na mosala oyo asalaki, kasi azalaki mpe koyoka mawa mpamba te ezalaki kaka na makambo mingi oyo akokaki kosala te.

Bato minei oyo tolobeli bakanisaki ete bayebi makambo oyo ekosala ete bázala na bomoi ya ntina. Nzokande, ata ntango bakokisaki mikano na bango, bazalaki kaka koyoka lokola nde eloko moko ezali kozanga bango. Ozali na mokano nini na bomoi na yo? Likambo nini eleki ntina na bomoi na yo? Omonaka mpenza ete okozala na bomoi ya ntina soki okokisi makambo oyo ozali kokana?