Mokanda euti na Bolivie

Azali na esengo mpe na elikya atako azali mobola

ATAKO nazali misionɛrɛ na mokili ya bobola, nakokaka kaka te komona bato oyo bazali babola mpe bazangi elikya. Mposa na ngai ezalaka ete mpasi esila nokinoki mpo na bato nyonso. Kasi, nayebi ete kaka Bokonzi ya Nzambe nde ekosilisa mikakatano wana. Nzokande, namonaka mbala mingi ete bato oyo balandaka Liloba ya Nzambe bakómaka na esengo atako mikakatano ezali. Sabina azali moko na bango.

Eleki bambula mingi, Sabina, ná bana na ye mibale ya basi na mabɔkɔ, amonaki ndenge mobali na ye azalaki komata na bisi moko ya kala mpo na kokende koluka mosala ya malamu na mboka mopaya. Basanza mpe bambula elekaki, Sabina azalaki se kozela mobali na ye, kasi tii lelo azongá te. Banda mobali na ye akendá, Sabina asengelaki kobunda mokolo na mokolo mpo na kozwa eloko ya kobikela mpo na ye moko mpe mpo na bana na ye, Milena ná Ghelian.

Nakutanaki na Sabina mpo na mbala ya liboso mokolo moko nsima ya midi, wana azalaki kotɛkela ebele ya bakiliya biloko na butiki ya yaya na ye ya mwasi. Ntango kaka natalaki elongi ya Sabina, namonaki ete alɛmbi mpo asali mosala makasi mokolo mobimba. Nasɛngaki ye nayekola Biblia na ye mpe na bana na ye. Alobaki boye: “Ezali malamu, kasi, nazali na misala mingi. Nakosepela oyekolaka nde na bana na ngai.” Nandimaki. Wana tozalaki kokoba koyekola na bana na ye, nayebaki Sabina malamu, mpe nayebaki mpasi na ye.

Mikolo nyonso, Sabina alamukaka na ngonga ya 4 ya ntɔngɔ. Ntango bana na ye balali naino na mwa ndako na bango ya shambre moko, Sabina apɛlisaka mɔtɔ. Na nsima, atɔkisaka na nzungu moko monene ya kala, misuni oyo akotya na mikate oyo atɛkaka mpo libota na ye ezwa mwa eloko ya kobikela. Na butu, liboso ya kolala, Sabina asalaka pɔtɔpɔtɔ ya mikate yango kitoko.

Sabina adefaka pusu mpe atyaka biloko nyonso oyo asengeli na yango: lingɛmbu (parapluie), resho, molangi ya bombone, mesa, bibonga, banzungu, mafuta, misuni, pɔtɔpɔtɔ ya mikate, mpe jus oyo asalaka ye moko.

Na ngonga ya 6 ya ntɔngɔ, Sabina ná bana na ye mibale bakangi ndako na bango na fungola mpe babimi. Bilongi na bango ezali na esengo te; bazali koloba te, kosɛka mpe te. Makanisi na bango nyonso ezali kaka na mosala oyo ezali kozela bango. Mikolo mingi na ntɔngɔ, na lininisa ya ndako na biso ya bamisionɛrɛ, namonaka bato mingi ya ndenge wana. Sabina azali kaka moko ya ebele ya basi oyo babimaka ntɔngɔntɔngɔ mpo na kotɛka biloko ya kolya mpe ya komɛla na babalabala ya Bolivie.

Na 6:30, ntango moi ebandi kobima, Sabina ná bana na ye bakómi na esika oyo batɛkaka. Mbala moko, babandi kokitisa biloko nyonso na pusu mpe kobongisa esika oyo bakolambela. Ntango atye mikate ya liboso na mafuta ya mɔtɔ, eleli tshɔlɔlɔ. Mbala moko nsolo kitoko epanzani na mopɛpɛ ya ntɔngɔ, ekómi kobenda bato oyo bazali na nzala.

Sabina atuni kiliya ya liboso: “Natyela yo mikate boni?” Na mpɔngi na miso, kiliya yango alobi eloko te, alakisi kaka misapi mibale, mpe Sabina atyeli ye mikate mibale ya mɔtɔ oyo etɛli na mafuta. Na nsima, azwi mwa mbongo oyo kiliya apesi. Ekosalema bongo mbala na mbala mokolo mobimba. Soki basilisi kotɛka, bakangi bisaka mpe bazongi ndako. Atako makolo esali mpasi mpo na mosala oyo asalaki na ntɔngɔ, Sabina akei sikoyo na mosala na ye ya mibale, na butiki ya yaya na ye ya mwasi.

Ntango nakómaki na butiki mpo na koyekola na bana na ye Biblia mbala ya liboso, nakutaki batye mwa bibonga mibale pembeni. Banda na ebandeli, Milena ná Ghelian, oyo na ntango wana bazalaki na mbula 9 mpe 7, bazalaki kozela boyekoli na esengo mpe komibongisa malamu. Mokemoke, bana wana oyo bazalaki nsɔninsɔni bafungwamaki mpe yango epesaki ngai nzela nakóma moninga na bango. Ntango Sabina amonaki bongo, asepalaki. Eumelaki te, atako azalaki na makambo mingi ya kosala, andimaki nabanda mpe koyekola na ye Biblia.

Ntango Sabina akómaki na boyebi mingi, bolingo na ye mpo na Yehova Nzambe mpe ebakisamaki. Akómaki na esengo, nzokande liboso azalaki bongo te! Mwasi oyo azalaki mawamawa mpe oyo azalaki kotɛka biloko na balabala, akómaki sikoyo ndenge mosusu. Azalaki lisusu mawamawa te, mpe elongi na ye ekómaki na esengo. Yaya na ye alobaki boye: “Sabina akómá kosɛka ntango nyonso. Kala azalaki bongo te.” Bato mosusu mpe bamonaki ete Sabina ná bana na ye bazali lisusu ndenge bazalaki liboso te. Mposa makasi oyo azalaki na yango banda kala ya koyeba Nzambe mpe mikano na ye ezalaki kokokisama.

Sabina azalaki kosepela mingi na boyekoli, kasi lokola azalaki na misala mingi, azalaki kozwa ntango ya koyangana na makita te. Nsukansuka, andimaki koya na Ndako ya Bokonzi. Banda wana, azangisaka makita te. Na lisangá, Sabina azwaki baninga ya solololo. Amonaki mpe ete Yehova akokisaka mpenza bamposa ya bato oyo balingaka ye mpe bamipimelaka makambo mosusu mpo na kosalela ye.​—Luka 12:22-24; 1 Timote 6:8.

Sabina azalaki kosepela na makambo oyo azalaki koyekola, mpe alingaki koyebisa yango epai ya bato mosusu. Kasi alobaki boye: “Nabangaka soki nakanisi likambo ya kobima na mosala ya kosakola.” Azalaki kokanisa boye: ‘Ngai, moto ya nsɔninsɔni mpe oyo atángá kelasi mingi te, nakokoka mpenza koteya bato mosusu?’ Atako bongo, boboto oyo bamoniselaki ye mpe mbongwana kitoko oyo amonaki na bomoi na ye etindaki ye asala likambo wana ya ntina mingi. Amonaki mpe ete bana na ye bazalaki kozwa ye lokola ndakisa na bango. Yango wana, abandaki koyebisa basusu nsango malamu. Bana na ye bazalaki na esengo ya kosala lokola ye.

Lelo oyo, Sabina azali lisusu te mwasi mobola oyo azangi esengo, oyo azalaki kolɛmba nsima ya kosala mosala mokolo mobimba. Akómá moto ya mbongo te. Kasi akómá kotalela bomoi na ndenge ya malamu. Lelo oyo, azwá batisimo mpe ayebisaka bato mosusu nsango malamu ya Bokonzi ya Nzambe, guvɛrnema kaka moko oyo ekosilisa mpo na libela bobola mpe mitungisi na mokili.​—Matai 6:10.

Na ngonga ya 5 ya ntɔngɔ, Sabina amibongisi mpo na kobima na ndako na ye ya shambre moko. Kasi, azali kokende kotɛka mikate te. Azali nde kokende kokutana na bandeko bakristo mpo bákende kosakola na balabala. Kopesa ntango na ye pɔsɔ nyonso mpo na kosalisa basusu ebakiselaka ye esengo na bomoi. Akangi ndako na ye mpe abimi na balabala, na esengo nyonso. Na esika atindika pusu, amemi nde sakosi moko ya monene. Na kati na yango, atye Biblia mpe mikanda oyo elimbolaka Biblia, oyo akosalela mpo na koyebisa basusu nsango oyo epesaka elikya. Na mwa kosɛka, Sabina alobi boye: “Nalɔtá ata mokolo moko te ete nakokoka koyebisa basusu makambo ya Biblia.” Abakisi boye: “Nalingi yango!”