Sekele 1

Lingá bato, kasi mbongo mpe biloko te

BIBLIA ETEYAKA NINI? “Bolingo ya mbongo ezali mosisa ya makambo mabe ya ndenge nyonso.”​—1 Timote 6:10.

MOKAKATANO EZALI WAPI? Bato oyo basalaka bapiblisite batindaka biso tósepela te na oyo tozali na yango. Balingaka tókóma baombo ya koluka mbongo mpo tósilisaka yango na kosomba biloko ya sika, ya kitoko, mpe ya minene. Mbongo ebendaka bato, mpe tokoki na pɛtɛɛ nyonso kokóma na bolingo ya mbongo. Nzokande, Biblia ekebisi biso ete moto oyo alingaka bozwi atondaka yango te. Mokonzi Salomo akomaki boye: “Moto oyo alingá palata akotonda palata te, mpe moto alingá bozwi akotonda mpe lifuti te.”​—Mosakoli 5:10.

OKOKI KOSALA NINI? Mekolá Yesu, yekolá kolinga bato koleka biloko. Yesu andimaki kopesa nyonso oyo azalaki na yango​—ata bomoi na ye—​mpo alingaki bato. (Yoane 15:13) Alobaki boye: “Esengo ya kopesa eleki oyo ya kozwa.” (Misala 20:35) Soki tozali na momeseno ya kosalela ntango na biso mpo na basusu mpe kopesa bango biloko mosusu, bango mpe bakosalela biso kaka bongo. Yesu alobaki boye: “Bópesaka, mpe bato bakopesa bino.” (Luka 6:38) Baoyo bamipesá na koluka mbongo mpe biloko ya mokili bamilukelaka mpasi mpe minyoko. (1 Timote 6:9, 10) Nzokande, moto azwaka esengo ya solosolo ntango azali kolinga basusu mpe basusu bazali kolinga ye.

Mpo na nini te komitalela lisusu mpo na komona soki okoki koyeisa bomoi na yo pɛpɛlɛ? Okoki kolongola biloko na yo mosusu to kotika oyo ozali koluka kobakisa? Soki osali bongo, okomona ete okozala na ntango mingi mpe makasi mpo na makambo eleki ntina na bomoi​—kosalisa bato mpe kosalela Nzambe oyo apesá yo nyonso oyo ozali na yango.​—Matai 6:24; Misala 17:28.

[Elilingi na lokasa 4]

“Bópesaka, mpe bato bakopesa bino”