1 Tokoki koyeba Nzambe te—Solo to lokuta?
Liteya oyo mbala mosusu oyoká: “Ndenge Nzambe asalaka makambo ezali libombami.”
“Tokoki koyeba Tata te, tokoki koyeba Mwana te, mpe tokoki koyeba elimo santu te.”—Liteya ya Athanase, mpo na kolobela Bosato ndenge eteyamaka na mangomba mingi ya bokristo.
Oyo Biblia eteyaka: Yesu alobaki ete baoyo ‘bakoyekola koyeba Nzambe ya solo kaka moko’ bakozwa mapamboli. (Yoane 17:3) Kasi, ndenge nini moto akoki kosala yango soki tokoki koyeba Nzambe te? Nzambe amibombi te, kutu alingi nde moto nyonso ayeba ye.—Yirimia 31:34.
Ya solo, tokoki koyeba makambo nyonso te mpo na Nzambe. Ezali bongo mpo makanisi mpe banzela na ye eleki oyo ya biso na mosika mpenza.—Mosakoli 3:11; Yisaya 55:8, 9.
Ndenge oyo solo ekoki kosalisa yo: Soki tokoki koyeba Nzambe te, ntina nini kolekisa ntango na koyekola koyeba ye? Nzambe alingi mpenza ete tóyeba ye, tókóma kutu baninga na ye. Nzambe abengaki Abrahame, moto moko ya sembo, ete “moninga na ngai,” mpe Davidi, mokonzi ya Yisraele, akomaki ete: “Yehova azali moninga ya motema ya baoyo babangaka ye.”—Yisaya 41:8; Nzembo 25:14.
Okanisaka ete moto akoki te kokóma moninga ya Nzambe? Soki okanisaka bongo, talá oyo Misala 17:27 elobi: “[Nzambe] azali mosika te na mokomoko na biso.” Na ndenge nini? Na kati ya Biblia, Nzambe ayebisi biso oyo tosengeli kosala mpo na koyeba ye malamu.a
Ayebisi biso nkombo na ye, Yehova. (Yisaya 42:8) Akomisaki makambo oyo asalaki epai ya bato mpo tóyeba bizaleli na ye. Longola yango, Nzambe amonisi ndenge oyo ayokaka na motema. Azali Nzambe ya “motema mawa mpe ya ngɔlu, ayokaka nkanda noki te mpe atondi na motema boboto mpe na solo.” (Kobima 34:6) Makambo oyo tosalaka ekoki kosepelisa ye to koyokisa ye mawa. Na ndakisa, na ntango ya kala, bato ya ekólo Yisraele “bayokisaki ye motema mpasi” ntango batombokelaki ye; nzokande, bato oyo batosaki ye, basepelisaki ye.—Nzembo 78:40; Masese 27:11.
[Maloba na nse ya lokasa]
a Mpo na koyeba makambo mosusu oyo Biblia elobi mpo na Nzambe, talá mokapo 1 ya buku Biblia eteyaka mpenza nini? ebimisami na Batatoli ya Yehova.
[Likanisi ya paragrafe na lokasa 4]
Soki Bosato ezali libombami, ndenge nini tokoki koyeba Nzambe?
[Eutelo ya bafɔtɔ na lokasa 4]
Bosato, soki mobu 1500, Flemish School, (16th century)/H. Shickman Gallery, New York, USA/The Bridgeman Art Library International