Biblia ebongolaka bato

NINI etindaki elenge mwasi moko azongela mateya ya Nzambe oyo baboti na ye bateyaki ye na bomwana? Tángá makambo oyo ye moko alobi.

“Sikoyo bomoi na ngai ekómi na ntina.”​—LISA ANDRÉ

ABOTAMAKI NA: 1986

EKÓLO: LUXEMBOURG

BOMOI NA YE YA KALA: MWANA YA MOBULU

NDENGE NAZALAKI: Nakolá na Bertrange, mwa engumba ya kitoko, ya kimya mpe ya bozwi oyo ezali pene ya engumba Luxembourg. Nazali mwana ya nsuka na libota ya bana mitano. Baboti na ngai bazali Batatoli ya Yehova, mpe basalaki makasi mpo na koteya ngai ná bayaya na ngai mibeko ya Nzambe.

Ntango nakómaki elenge, nazalaki lisusu kondima mpenza mateya ya Batatoli ya Yehova te. Liboso, nazalaki kokipe likambo yango te, kasi mokemoke kondima na ngai ebandaki kolɛmba. Baboti na ngai basalaki nyonso mpo na kosalisa ngai nalanda nzela ya malamu, kasi naboyaki koyokela bango. Na kobatama, nakómaki kolekisa ntango ná bilenge ya mobulu. Ngai mpe nalingaki kozala lokola bango, kosala makambo ndenge motema elingi. Tozalaki na bomoi ya loyenge, tozalaki kosangisa nzoto, komɛla bangi mpe masanga. Na ebandeli nazalaki kosepela kozala na bato oyo nazalaki komona ete bazali mpenza na bomoi ya esengo.

Nzokande, nazalaki mpenza na esengo ya solosolo te. Kozala ná baninga wana esalisaki ngai ata na likambo moko te; moto nyonso azalaki mafumafu. Kasi makambo lokola kozanga bosembo oyo etondi na mokili ezalaki kotungisa ngai. Nazalaki ntango nyonso kotungisama na makanisi.

NDENGE BIBLIA EBONGOLI NGAI: Ntango nakómaki na mbula 17, mokolo moko makanisi na ngai etungisamaki mingi. Mama amonaki ete nazalaki na esengo te, yango wana asɛngaki ngai nayekola lisusu Biblia. Alendisaki ngai natalela mateya na yango mpe natala soki nakosepela kosalela yango to te. Lisolo wana ya mama ná mwana esalisaki ngai mpenza. Nandimaki ete yaya na ngai Caroline ná mobali na ye Akif, báyekola na ngai Biblia. Akif akolá na libota ya Batatoli ya Yehova te, akómaki Motatoli ya Yehova ntango azalaki mokóló. Mpo na yango, namonaki ete nakoki koyebisa ye makambo nyonso oyo ezalaki na ntina mpo na ngai.

Nayebaki ete makambo oyo nazalaki kosala ebongi te mpo na Motatoli ya Yehova, kasi na ebandeli nazalaki koloba ete makambo oyo nazali kosala na bomoi na ngai etali kaka ngai moko. Kasi, boyekoli ya Biblia esalisaki ngai nayeba ete makambo nasalaka ekoki kopesa Yehova mawa to esengo. (Nzembo 78:40, 41; Masese 27:11) Nayaki mpe koyeba ete makambo oyo nasalaka ekoki kosepelisa bato mosusu to kopesa bango mpasi.

Ntango nazalaki kokoba koyekola Biblia, namonaki makambo oyo endimisaki ngai ete ezali Liloba ya Nzambe. Na ndakisa, nayekolaki bisakweli mingi ya Biblia oyo ekokisamaki ndenge mpenza elobamaki. Yango esilisaki ntembe oyo nazalaki na yango.

Nsima ya koyekola Biblia mbula soki moko, ngai ná baboti na ngai tokendaki kotala yaya na ngai ya mobali oyo azalaki kosala na biro ya Batatoli ya Yehova na Allemagne. Namonaki ete ndeko na ngai azalaki mpenza na esengo, mpe yango etindaki ngai nakanisa mingi. Esengo ya ndenge wana nde nazalaki koluka! Nasepelaki mpe makasi na bomoi ya Batatoli ya Yehova mosusu oyo bazalaki kosala kuna. Bakesanaki mpenza na bato ya bosembo te mpe oyo balingá bisengo, oyo nazalaki kotambola na bango. Eumelaki te, nabondelaki Yehova mpe nalakaki ete nakosalela ye bomoi na ngai mobimba. Ntango nakómaki na mbula 19, nazwaki batisimo mpo na komonisa ete namipesi epai ya Yehova.

MATOMBA OYO NAZWI: Sikoyo bomoi na ngai ezali na ntina. Koteya basusu Biblia, kosalisa bango báyeba makambo ya Yehova mpe bilaka na ye, epesaka ngai esengo. Libota na ngai ezwi mpe matomba, emitungisaka lisusu te mpo na ngai.

Nayebi ete nasalá mabe mingi, kasi nalingaka te kokanisakanisa yango. Natyaka nde makanisi na motema mawa ya Yehova mpe na bolingo mpe likebi oyo atyelaka ngai. Nandimaka mpenza maloba ya Masese 10:22, oyo elobi ete: “Lipamboli ya Yehova​—yango nde ekómisaka moto mozwi, mpe abakisaka mpasi ata moko te na yango.”

[Likanisi ya paragrafe na lokasa 12]

“Tozalaki na bomoi ya loyenge, tozalaki kosangisa nzoto, komɛla bangi mpe masanga”

[Likanisi ya paragrafe na lokasa 13]

“Nayebi ete nasalá mabe mingi, kasi nalingaka te kokanisakanisa yango”