Mituna ya batángi

Nasengeli kosala nini soki nazali na motuna na likambo moko oyo natángi na Biblia to soki nazali na mposa ya toli na likambo moko boye?

Masese 2:1-5 elendisi mokomoko na biso ‘akoba koluka’ mayele mpe bososoli ndenge bato balukaka “biloko ya motuya oyo ebombani.” Yango elakisi ete biso moko tosengeli kosala makasi tóluka kozwa biyano na mituna na biso na makambo ya Biblia mpe kosilisa mikakatano na biso. Ndenge nini tokoki kosala yango?

Buku Zwá matomba na mateya ya Eteyelo ya mosala ya Teokrasi na nkasa 33 tii 38, na motó ya likambo “Ndenge ya kolukaluka na mikanda,” emonisi ndenge ya kosalela mikanda ya “moombo ya sembo mpe ya mayele” mpo na kozwa biyano na mituna na biso. (Mat. 24:45) Lokasa 36 emonisi ndenge ya kosalela Index des publications Watch Tower, oyo ekabwani na biteni mibale: index ya masolo mpe index ya bavɛrsɛ. Na yango, mpo na koluka likambo moko, okoki kotala liloba to vɛrsɛ moko boye, mpe okomona mikanda oyo elobeli likambo yango. Ntango ozali koluka eyano to toli na likambo moko, zalá na motema molai. Kobosana te ete ozali koluka “biloko ya motuya oyo ebombani”; ezwaka ntango mpe esɛngaka kosala milende.

Ya solo, ezali na makambo mosusu mpe bavɛrsɛ mosusu oyo mikanda na biso elobelá mpenzampenza te. Mpe ata soki tolobelá vɛrsɛ moko boye, mbala mosusu tolobelá yango mpenzampenza te na ndenge oyo epesi eyano na motuna na yo. Lisusu, masolo mosusu ya Biblia ekoki kotinda yo omituna mituna mpo Biblia elobi makambo nyonso polele te. Na yango, tokoki te kozwa na mbala moko biyano na motuna nyonso oyo tomituni. Soki esalemi bongo, tosengeli koboya kopesapesa makanisi na biso moko na makambo oyo biyano ekozwama te, noki tómikɔtisa na bantembe mpo na “mituna oyo ekotinda na kolukaluka mpamba na esika ya kozwa eloko moko oyo euti na Nzambe oyo ekolendisa kondima.” (1 Tim. 1:4; 2 Tim. 2:23; Tito 3:9) Ezala biro ya filiale to biro monene ya Batatoli ya Yehova ekoki te kotalela mpe kopesa biyano na motuna nyonso ya ndenge wana oyo elobelami te na mikanda na biso. Tosengeli kondima ete Biblia ezali na makambo nyonso oyo esengeli mpo na kotambwisa biso, mpe ete elobeli te makambo mosusu ya mikemike mpo epesa biso libaku ya komonisa ete tozali na kondima makasi epai ya Nzambe, nkolo Biblia.​—Talá buku Pusaná penepene na Yehova, nkasa 185 tii 187.

Bongo soki osali nyonso oyo okoki mpo na koluka toli na likambo moko oyo ezali kotungisa yo kasi ozali kozwa kaka te? Sololá na mokristo moko oyo akɔmɛli, mbala mosusu nkulutu moko na lisangá na bino. Bankulutu bayebi Biblia malamu mpe bakutaná na makambo mingi na bomoi na bango ya bokristo. Lokola bango bayebi yo malamu mpe bozali esika moko, toli na bango ya mayele ekosalisa yo mingi soki ozali koluka ndenge ya kosilisa mokakatano moko to ya kozwa ekateli. Kobosana mpe te kobondela Yehova mpo na mitungisi na yo mpe kosɛnga ye asalisa yo na nzela ya elimo santu na ye “mpo Yehova ye moko apesaka bwanya . . . ná bososoli.”​—Mas. 2:6; Luka 11:13.