Pusaná penepene ya Moyoki ya mabondeli

BATO mingi oyo balobaka ete bandimelaka Nzambe, bakokaka te komonisa ntina oyo bandimelaka ye. Bakokaka mpe te kolimbola mpo na nini mbala mingi mangomba esalaka makambo ya mabe, to mpo na nini Nzambe atiki ete bampasi ezala. Basukaka kaka na kobondela Nzambe oyo bayebi kutu te soki azali nani.

Kasi yo, okoki kutu kopusana penepene na Nzambe. Okoki kokóma na kondima makasi soki oyebi Nzambe malamu mpe yango ekosala ete olinga ye mpe osepela na ye. Kondima ya solosolo eutaka na makambo oyo endimisi moto. (Baebre 11:1) Soki oyekoli mateya ya solo oyo etali Nzambe, okoyeba ye mpe okosolola na ye ndenge osololaka na moninga. Tótalela naino makambo oyo bato mosusu bakutanaki na yango, oyo atako bazalaki kobondela, bazalaki kondima te ete Nzambe azali.

◼ Patricia, oyo tolobelaki na lisolo ya ebandeli, alobi boye: “Mokolo moko, nazalaki na baninga na ngai oyo bazalaki soki zomi mpe babandaki kolobela makambo ya Nzambe. Nayebisaki bango ete nabimaki na ndako mpo na kokima masolo oyo tata na ngai oyo andimaka Nzambe te, azalaki kosolola na Motatoli moko ya Yehova. Moninga na ngai moko alobaki boye: ‘Ekoki kozala ete Batatoli ya Yehova balobaka solo.’

Moninga mosusu alobaki boye: “‘Mpo na nini te tókende na moko ya makita na bango mpo tótala naino?’ Mpe tosalaki bongo. Atako tozalaki na bantembe, mingi na biso tokobaki koyangana kaka mpo Batatoli ya Yehova bazalaki na boboto.

“Kasi, mokolo moko ya lomingo, nayokaki likambo moko oyo ebongolaki makanisi na ngai. Moto oyo azalaki kosala diskur, alimbolaki ntina oyo bato banyokwamaka. Liboso, nayebaki te ete na ebandeli Nzambe akelaki moto ya kokoka mpe ete lisumu ná liwa ekɔtaki mpo na moto moko mpe na nsima epalanganaki epai ya bato nyonso. Ndeko yango amonisaki mpe ntina oyo esengelaki Yesu akufa mpo bato bázongela lisusu bomoi oyo moto ya liboso abungisaki.a (Baroma 5:12, 18, 19) Mbala moko, nabandaki kokanga ntina ya makambo nyonso. Nalobaki ete ‘ezali mpenza na Nzambe oyo atyelaka biso likebi.’ Nakobaki koyekola Biblia mpe eumelaki te, mpo na mbala ya liboso na bomoi na ngai, namonaki ete nakoki kobondela Nzambe moko oyo azali mpenza.”

◼ Allan, oyo tolobelaki mpe na lisolo ya ebandeli, alobi boye: “Mokolo moko, Batatoli ya Yehova bayaki na ndako na biso, mpe mwasi na ngai ayambaki bango mpo azalaki kosepela na makambo oyo bazalaki koloba mpo na bomoi ya seko awa na mabele. Nasilikaki makasi. Natikaki bapaya yango na salon, nabendaki mwasi na ngai na kuku mpe nayebisaki ye boye: ‘Fungolá miso. Okoki kondima makambo ya boye te!’

Alobaki na ngai boye: “‘Soki boye, okoki kokende komonisa bango ete bazali na libunga.’

“Nazalaki ata na eloko moko te ya koloba liboso na bango. Kasi, Batatoli yango bazalaki na boboto mingi mpe batikelaki ngai buku moko oyo ezali komonisa soki bomoi eutá na bozalisi to na evolisyo. Buku yango elobelaki makambo mpenza polele mpe na ndenge ya kondimisa, yango wana nazwaki ekateli ya koyeba lisusu makambo mingi oyo etali Nzambe. Nabandaki koyekola Biblia na Batatoli ya Yehova mpe eumelaki te, namonaki ete makambo oyo Biblia elobaka ekeseni mpenza na oyo nyonso nazalaki liboso kokanisela mangomba. Wana nazalaki kokoba koyekola makambo ya Yehova, mabondeli na ngai ekómaki ya malamu mpenza. Nazalaki na bizaleli mosusu oyo ezalaki mpenza malamu te, yango wana nabondelaki ye asalisa ngai. Nandimi mpenza ete Yehova ayanolaki na mabondeli na ngai.”

◼ Andrew, oyo afandaka na Angleterre, alobi boye: “Atako nazalaki kosepela mingi na makambo ya siansi, nazalaki kondima liteya ya evolisyo kaka mpo bato mosusu bazalaki koloba ete ezali na bilembeteli oyo emonisi ete liteya yango ezali solo. Naboyaki kondima ete Nzambe azali mpo na makambo nyonso ya mabe oyo esalemaka.

“Kasi, na ntango mosusu, nazalaki kokanisa boye: ‘Soki Nzambe azali, boye nasengeli koyeba soki makambo nyonso oyo elingi koloba nini. Mpo na nini mobulu mpe bitumba ezali mingi?’ Na ntango ya mikakatano, nazalaki ntango mosusu kobondela mpo na koluka lisalisi, kasi, nayebaki te soki nazalaki kobondela nani.

“Na nsima, moto moko apesaki mwasi na ngai trakte moko ya Batatoli ya Yehova, oyo elobaki: Mokili ya lelo ekoumela lisusu? Yango nde motuna oyo nazalaki komituna mbala mingi. Trakte yango etindaki ngai namituna ‘soki ebongi mpenza kotyela biyano ya Biblia motema.’ Na nsima, ntango nazalaki na konje, moto moko apesaki ngai buku La Bible: Parole de Dieu ou des Hommes?b Ntango nayebaki ete Biblia ezali na boyokani na siansi, namonaki ete nasengeli koyekola lisusu makambo mingi ya Biblia. Yango wana, ntango Motatoli moko ya Yehova asɛngaki ayekolisa ngai yango, nandimaki. Ntango nayebaki mokano ya Yehova, nakómaki komona ete azali moto ya solo, oyo nakoki kosolola na ye na nzela ya libondeli na bonsomi nyonso.”

◼ Jan, oyo akolá na Lingomba ya Protesta na Londres, alobi boye: “Bokosi ya mangomba mpe bampasi oyo etondi na mokili etindaki ngai natika kosambela. Natikaki mpe kokende kelasi mpe nabandaki koyemba mpe kobɛta gitare mpo na kozwa mbongo. Ezali na ntango wana nde nakutanaki na Pat. Akolaki na Lingomba ya Katolike mpe atikaki kosambela lokola ngai.

“Tozalaki kofanda na ndako moko oyo basundolá ná bato mosusu oyo batiká mpe mangomba na bango mpe bakómaki kosepela na mangomba ya Azia. Na butu makasi, tozalaki kolekisa ntango mingi mpo na kolobela ntina ya bomoi. Atako ngai ná Pat tozalaki kondima Nzambe te, tozalaki koloba ete esengeli kozala na ‘nguya moko boye oyo esimbi bomoi.’

“Na nsima, ntango tokendaki na nɔrdi ya Angleterre mpo na koluka mosala ya baalanga-nzembo, mwana na biso ya mobali abotamaki. Mokolo moko na butu, abɛlaki mpe nabandaki kobondela Nzambe oyo nazalaki kondima te ete azali. Mwa moke na nsima, matata ekɔtaki kati na ngai ná Pat, nazwaki mwana mpe nakendaki epai mosusu. Nabondelaki lisusu mpo nazwa lisalisi, na likanisi ete ntango mosusu moto moko azali koyoka ngai. Kozanga koyeba, Pat mpe asalaki bongo.

“Na nsima, kaka na mokolo wana, Batatoli ya Yehova mibale bayaki na ndako ya Pat mpe bamonisaki ye toli mosusu ya Biblia oyo ekokaki kosalisa ye. Pat abengaki ngai na telefone mpe atunaki ngai soki nakolinga ete ngai ná ye tóyekola Biblia na Batatoli ya Yehova. Eumelaki te, toyebaki ete mpo na kosepelisa Nzambe, tosengeli kokomisa libala na biso na Leta. Yango ezalaki likambo moko ya mpasi mpenza mpo ngai ná Pat tozalaki koyokana malamu te.

“Tozalaki na mposa ya koyeba makambo mingi oyo etali kokokisama ya bisakweli ya Biblia, ntina oyo bato banyokwamaka mpe soki Bokonzi ya Nzambe ezali nini. Mokemoke, toyebaki ete Nzambe atyelaka biso likebi mpe tozalaki na mposa ya kotosa maloba na ye. Tobalanaki. Bwanya ya Liloba ya Nzambe esalisaki biso tóbɔkɔla bana na biso misato. Tondimi mpenza ete Yehova ayokaki mabondeli na biso.”

Yo moko talelá makambo oyo emonisi ete Nzambe azali

Ndenge moko na bamilio mosusu ya bato, bato oyo tolobeli na lisolo oyo, baboyaki kokosama na mangomba ya lokuta mpe balukaki koyeba ntina oyo Nzambe atiki ete bampasi ezala. Omoni te ete na bandakisa oyo nyonso, boyebi ya sikisiki ya Biblia nde esalisaki mokomoko na bango andima ete Yehova ayokaka mpenza mabondeli?

Okosepela kotalela makambo oyo emonisi ete Nzambe azali? Batatoli ya Yehova bakosepela kosalisa yo oyekola mateya ya solo oyo etali Yehova mpe bakomonisa yo ndenge oyo okoki kopusana penepene na “Moyoki ya libondeli.”​—Nzembo 65:2.

[Maloba na nse ya lokasa]

[Likanisi ya paragrafe na lokasa 10]

“Ntango nayebaki mokano ya Yehova, nakómaki komona ete azali moto ya solo, oyo nakoki kosolola na ye na nzela ya libondeli na bonsomi nyonso”

[Elilingi na lokasa 9]

Kondima ya solosolo eutaka na makambo oyo endimisi moto mpe mposa ya koyeba mateya ya solo oyo etali Nzambe