Okoki kobɔndisama mpe kobɔndisa basusu

Moko ya makambo oyo esalisaka biso ezali libɔndisi oyo tozwaka epai ya bato ya libota na biso, baninga na biso, mpe bandeko na biso bakristo.

Maloba ya boboto ya moninga moko ekoki kozala lokola mafuta oyo ezali kosilisa mpasi na biso mpe kobɔndisa biso. (Mas. 16:24; 18:24; 25:11) Kasi, bakristo ya solo bazelaka kaka te ete basusu bábɔndisa bango. Balukaka mpe mabaku ya ‘kobɔndisa baoyo bazali na ndenge nyonso ya bolɔzi na kobɔndisama oyo [bango moko] babɔndisami na Nzambe.’ (2 Ko. 1:4; Luka 6:31) Likambo ya ndenge wana ekómelaki Antonio, mokɛngɛli ya etúká moko na Mexique.

Ntango bazwaki ye na maladi ya kanser ya makila, Antonio amitungisaki mingi. Atako bongo, asalaki makasi atika te ete makanisi mabe elonga ye. Na ndenge nini? Azalaki komeka komikundola banzembo ya Bokonzi mpe koyemba yango mpo akoka koyoka mpe amanyola na maloba na yango. Kobondela na mongongo makasi mpe kotánga Biblia ebɔndisaki mpe ye mingi.

Kasi sikoyo Antonio amonaka ete bandeko na ye bakristo basalisaki mpe ye mingi. Alobi boye: “Ntango ngai ná mwasi na ngai tozalaki komitungisa mingi, tozalaki kosɛnga ndeko na biso moko ya libota oyo azali nkulutu na lisangá aya mpe abondela elongo na biso. Yango ezalaki kobɔndisa biso mpe kokitisa biso mitema.” Abakisi ete: “Lokola bandeko na biso ya libota mpe bandeko ya lisangá basalisaki biso, nsima ya mwa ntango moke tolongaki makanisi oyo ezalaki kotungisa biso.” Ndeko yango azalaki na botɔndi mingi ya kozala na baninga ya ndenge wana oyo balingaka ye mpe batyelaka ye likebi!

Eloko mosusu oyo esalisaka biso ntango tokutani na mikakatano ezali elimo santu. Ntoma Petro alobaki ete elimo santu ya Nzambe ezali “likabo ya ofele.” (Mis. 2:38) Likambo yango emonanaki polele ntango bato mingi batyamaki mafuta na elimo na Pantekote ya mobu 33 T.B. Kasi biso nyonso tokoki mpe kozwa elimo santu. Lokola Nzambe atikaka te kopesa biso elimo santu, tosengeli kosɛnga ye apesaka biso yango mingi.​—Yis. 40:28-31.

MONISÁ ETE OMIBANZABANZAKA MPO NA BAOYO BAZALI KONYOKWAMA

Ntoma Paulo ayikaki mpiko na mikakatano ebele; kutu na mabaku mosusu, amonaki liwa na miso. (2 Ko. 1:8-10) Atako bongo, Paulo azalaki kobanga liwa te. Abɔndisamaki na ndenge ayebaki ete Nzambe azalaki kosunga ye. Akomaki ete: “Nzambe mpe Tata ya Nkolo na biso Yesu Kristo apambwama, Tata ya motema mawa mingi mpe Nzambe ya kobɔndisama nyonso, oyo abɔndisaka biso na kati ya bolɔzi na biso nyonso.” (2 Ko. 1:3, 4) Ntoma Paulo atikaki te ete mikakatano elɛmbisa ye. Mikakatano oyo ayikelaki mpiko esalisaki nde ye ayekola komitya na esika ya basusu, mpe ayeba ndenge ya kobɔndisa basusu ntango bazali na mposa ya libɔndisi.

Ntango Antonio abikaki, azongelaki mosala na ye ya mokɛngɛli-motamboli. Liboso, azalaki mpe kotyela bandeko na ye bakristo likebi; kasi kobanda wana, ye ná mwasi na ye bakómaki mpenza kosala makasi bákendaka kotala bandeko oyo bazali kobɛla mpo na kolendisa bango. Na ndakisa, ntango akendaki kotala ndeko moko oyo azalaki kobundana na maladi moko ya makasi, Antonio amonaki ete ndeko yango azalaki kolinga kokende na makita te. Antonio alobi boye: “Ndeko yango azalaki kaka kolinga Yehova mpe bandeko; kasi mpo na maladi na ye, akómaki komimona ete azali lisusu na ntina te.”

Mpo na kolendisa ndeko oyo azalaki kobɛla, Antonio asɛngaki ye asala libondeli na libaku moko oyo bakutanaki na bandeko mosusu. Atako ndeko yango akanisaki ete akokoka te, andimaki kosala libondeli. Antonio alobi boye: “Asalaki libondeli moko ya malamu mpenza, mpe nsima na yango, azalaki lisusu te ndenge azalaki liboso. Amiyokaki lisusu ete azali na ntina.”

Ya solo, biso nyonso tosilá kokutana na mikakatano ndenge na ndenge, ezala ya mike to ya minene. Kasi, ndenge Paulo alobaki, mikakatano yango ekoki kosalisa biso tóyeba ndenge ya kobɔndisa basusu ntango bazali na mposa ya libɔndisi. Yango wana, tótyaka likebi na bampasi ya bandeko na biso bakristo mpe tóbɔndisaka basusu mpo na komekola Nzambe na biso Yehova.