Basali ndenge balobaki!

ANTONIO azalaki na kelasi ya nsuka na eteyelo ya ntei mpe alingaki kopesa baninga na ye ya kelasi litatoli. Na yango, asɛngaki na profɛsɛrɛ na bango ya istware ete alakisa kasɛti video La fermeté des Témoins de Jéhovah face à la persécution nazie. Atako azalaki kokakatana, profɛsɛrɛ yango andimaki mpe alobaki ete akolakisa kasɛti video yango na mokolo oyo elandi.

Antonio alobi ete: “Na ebandeli, profɛsɛrɛ azalaki mpenza kotyola kasɛti yango, kasi ntango amonaki ete bato minene ya istware bazali kolobela lisolo ya Batatoli ya Yehova na kati ya kaa ya bakangami, atyaki likebi mpenza. Mpe na nsuka, apesaki ngai matɔndi mpo nazwaki likanisi ya kotalisa kasɛti wana.”

Ntango akɔtaki na kelasi na mokolo oyo elandaki, profɛsɛrɛ yango amekaki kolobela mosala ya Bibelforscher, nkombo ya Batatoli ya Yehova na Allemagne na ntango wana; kasi amonaki ete ekozala malamu soki Antonio ye moko alobeli yango. Antonio alimbolaki mosala ya Batatoli ya Yehova na mokili mobimba mpe alobelaki bindimeli na bango mosusu. Na nsuka alobaki boye: “Emonani ete bato bakozwa ata litomba moko te na nsango kitoko oyo tozali komema soki bazali koyoka biso te, soki bazali kokangela biso bikuke na bango to soki bazali kotánga mikanda na biso te.”

Baninga nyonso ya kelasi ya Antonio bandimaki makanisi wana mpe profɛsɛrɛ yango asɛngaki bango bámityela mokano moko. Alobaki ete soki bokutani na Batatoli ya Yehova mpo na mbala ya liboso, bóyoka bango mpe bóndima mikanda na bango. Bana kelasi bazalaki kaka kolobela kasɛti wana ata nsima ya mwa ntango. Kanisá naino esengo oyo Antonio azalaki na yango na mikolo oyo elandaki ntango amonaki ebele ya baninga na ye ya kelasi bazali koya na mikanda ya la Société Watch Tower mpe, na esengo nyonso, mokomoko azalaki koyebisa ye ete: “Omoni, nasali ndenge nalobaki!”