Okoki kotyela lingomba motema na likambo etali bitumba?
Alberto oyo asalaki mosala ya soda na boumeli ya mbula soki 10; alobi boye: “Sango ya basoda apambolaki biso mpe ayebisaki biso ete ‘Nzambe azali elongo na bino.’ Kasi na nse ya motema nalobaki boye: ‘Nazali kokende koboma bato, kasi Biblia elobi, “osengeli koboma te.”’”
Ray azalaki moko ya basoda oyo babundaki na mai na boumeli ya Etumba ya Mibale ya mokili mobimba. Mokolo moko atunaki sango ya basoda boye: “Oyei kobondela na masuwa mpo basoda bálonga etumba. Banguna mpe basali bongo, boye te?” Sango yango ayanolaki ete ndenge Nkolo asalaka makambo ezali libombami.
Soki eyano yango esepelisi yo te, yebá ete ozali yo moko te.
BIBLIA ETEYAKA NINI?
Yesu alobaki ete “kolinga mozalani na yo lokola yo moko,” ezali moko ya mibeko ya Nzambe oyo eleki monene. (Marko 12:31) Yesu alobaki nde ete mpo na kolinga mozalani na biso esengeli kotalela esika oyo afandaka to ekólo na ye? Te. Ayebisaki bayekoli na ye ete: “Na ndenge yango bato nyonso bakoyeba ete bozali bayekoli na ngai, soki bozali na bolingo na kati na bino.” (Yoane 13:34, 35) Lokola bakomoniselana mpenza bolingo, bakoyebana mpo na ezaleli yango. Bakopesa kutu bomoi na bango mpo na basusu na esika ya koboma bango.
Bakristo ya liboso batosaki maloba wana ya Yesu. Buku moko (The Encyclopedia of Religion) elobi boye: “Batata ya liboso ya Lingomba, ata mpe Tertullien ná Origène balobaki ete epekisamaki mpo na bakristo koboma moto, yango wana bakokaki te kokɔta na limpinga ya Roma.”
BATATOLI YA YEHOVA BASALAKA NDENGE NINI?
Batatoli ya Yehova bafandaka na bikólo mingi, bamosusu kati na bango bafandaka kutu na bikólo oyo eyokanaka te. Ata bongo, basalaka makasi bábatela bolingo; ezaleli oyo esalaka ete bato bayeba bango.
Bakonzi ya mangomba bateyaka bolingo ya solosolo ya bokristo?
Na ndakisa, na 1994 ntango Bahutu ná Batutsi bazalaki kobunda na Rwanda, Batatoli ya Yehova bamikɔtisaki te na etumba yango. Batatoli Bahutu babombaki oyo ya Batutsi mpe oyo ya Batutsi basalaki mpe bongo; atako mbala mingi kosala bongo ezalaki kotya bomoi na bango na likama. Ntango bakangaki Batatoli Bahutu mibale oyo babombaki bandeko na bango Batutsi, soda moko ya Hutu ya Interahamwe alobaki boye: “Bosengeli kokufa mpo bokimisaki Batutsi.” Likambo ya mawa, babomaki Batatoli Bahutu yango mibale.—Yoane 15:13.
Okanisi nini: Makambo oyo Batatoli ya Yehova basalaka eyokani na maloba ya Yesu oyo etali bolingo ya solosolo?