Mpo na nini osengeli kotyela Biblia likebi?

Biblia ezali buku oyo bato mingi bazali na yango koleka babuku mosusu nyonso. Mpo na nini? Mpo ezalaka mpasi te kokanga ntina ya makambo na yango. Ezali na masolo ya solosolo ya bato oyo bazalaki mpenza na bomoi mpe elobelaka boyokani oyo bazalaki na yango na Nzambe mpe bato mosusu. Masolo yango ezali na mateya kitoko na maloba ya pɛtɛɛ oyo ekoki kobongolama na bankama ya minɔkɔ mpe oyo bato ya bisika mpe bileko nyonso bakoki kokanga ntina na yango. Lisusu, batoli ya Biblia ezalaka ntango nyonso na ntina.

Likambo eleki ntina, Biblia ezali kaka te buku oyo elobelaka makambo ya Nzambe kasi mpe buku oyo euti na Nzambe. Emonisi nkombo ya Nzambe, bizaleli na ye, mpe mokano oyo azalaki na yango ntango asalaki mabele mpe bato. Biblia emonisi mpe ndenge oyo banda kala, mabe ná malamu eyokanaka te: lisolo moko kitoko oyo etali mokili mobimba mpe oyo ekosuka na ndenge moko ya malamu mpenza. Na yango, kotánga Biblia na makanisi malamu esalisaka moto akóma na kondima mpe elikya.

Biblia ezali na makambo oyo tokokuta yango na babuku mosusu te. Na ndakisa, eyebisi biso solo na makambo lokola oyo:

• Epai oyo toutá mpe ntina oyo tonyokwamaka

• Oyo Nzambe asalá mpo na kosikola bato

• Oyo Yesu asalá mpo na biso

• Ndenge oyo mabele ekokóma mpe bomoi ya bato na mikolo ezali koya

Mpo na nini te kobwaka mwa liso na nkasa oyo elandi mpe kotalela nsango oyo ezali na Biblia?