ELOBELI TITRE YA EZIPELI | MATEYA YA LOKUTA OYO ETINDAKA BATO BÁLINGA NZAMBE TE
Liteya ya lokuta oyo elobaka ete Nzambe azali na nkombo te
OYO BATO MINGI BANDIMAKA
“Toyokani te mpo na koyeba soki Nzambe azali na nkombo, mpe ata soki toyokani, ekozala nkombo nini?”—David Cunningham, profɛsɛrɛ ya teoloji.
OYO BIBLIA ELOBI
Nzambe alobaki ete: “Ngai Yehova. Yango nde nkombo na ngai.” (Yisaya 42:8) Na Ebre nkombo “Yehova” elimboli “Akómisaka”.
Yehova alingaka tósalela nkombo na ye. Biblia elobi ete: “Bóbelela nkombo na ye. Bóyebisa bato ya bikólo misala na ye. Bóloba ete nkombo na ye etombwani likoló.”—Yisaya 12:4.
Yesu azalaki kosalela nkombo ya Nzambe. Na libondeli moko, ayebisaki Yehova boye: “Nayebisi bango [bayekoli ya Yesu] nkombo na yo mpe nakoyebisa yango.” Mpo na nini Yesu ayebisaki bayekoli na ye nkombo ya Nzambe? Abakisaki boye: “Mpo bolingo oyo olingaki [Nzambe] ngai na yango ezala na kati na bango mpe ngai na bomoko elongo na bango.”—Yoane 17:26.
MPO NINI EZALI NA NTINA?
Walter Lowrie, moto moko ya teoloji akomaki boye: “Moto oyo ayebi nkombo ya Nzambe te, akoki mpe te koyeba ete azali solo mpenza mpe akoki kolinga ye te, soki ayebi ye kaka ete azali nguya moko boye.”
Kobomba nkombo ya Nzambe to kotya nkombo mosusu na esika na yango ezali lokola koboya ete ezala na Biblia
Moto moko na nkombo Victor azalaki kokende ndako-nzambe pɔsɔ nyonso, kasi azalaki komona ete ayebi mpenza Nzambe te. Alobi boye: “Ntango nayebaki ete nkombo ya Nzambe ezali Yehova, yango esalisaki ngai nayeba ye malamu. Namiyokaki lokola nakutani sikoyo na moto oyo nayoká nsango na ye mingi. Nayaki koyeba ete azali mpenza mpe nakómaki moninga na ye.”
Yehova apusanaka penepene na bato oyo basalelaka nkombo na ye. Mpo na baoyo “bakanisaka nkombo na ye,” Nzambe apesi elaka oyo: “Nakomonisela bango motema mawa, ndenge moto amoniselaka mwana na ye oyo azali kosalela ye motema mawa.” (Malaki 3:16, 17) Nzambe apambolaka mpe baoyo babelelaka nkombo na ye. Biblia elobi ete: “Moto nyonso oyo akobelela nkombo ya Yehova akobika.”—Baroma 10:13.