Tósalisa bazalani ete ‘bátosa makambo makomami’
1 Ekoki te bobele ‘koyoka’ maloba ya bisakweli oyo bizwami kati na mokanda ya Emoniseli. Litomba likozwama mpenza bobele soki ‘totosi’ makambo oyo makomami. (Emon. 1:3) Mpo na moto oyo alingi kozalisa bayekoli, kotika mikanda epai na bato ezali bobele litambe ya liboso. Nsima na kokutana na moto oyo asepeli na nsango mpe azali na mposa ya koyoka, tosengeli kozonga nokinoki mpo na kosalisa ye na koyeba makambo mingi lisusu. Tokoki kolobela nini ntango tokozonga na mbala ya nsima?
2 Soki tolobelaki batamboli minei ya mpunda ya elilingi na mbala eleki, tokoki kobanda lisolo boye:
◼ “Mbala eleki, tolobelaki mokanda ya Emoniseli mpe tomonaki ete makambo oyo mazali kosalema na mokili mazali kokokisa bisakweli na yango lelo. Emoniseli mokapo 6 esakolaki bopoti ya batamboli minei ya mpunda ya elilingi oyo basengelaki komema mobulu mpe mawa awa na mabele. Tozali komona lolenge makambo yango mazali kosalema na miso na biso. Bato mingi bazali komituna soki nsuka ya bampasi yango ekoya ntango nini mpe bomoi ya esengo kati na mokili ya kimya ekobanda ntango nini. Bongo yo, okanisi nini mpo na yango? [Tótika moto yango ayanola.] Bayekoli ya Yesu balukaki koyeba eyano na motuna wana.” Tótánga Matai 24:3, epai kuna motuna yango etunami, mpe tótánga molɔngɔ 34, epai Yesu apesi eyano. Soki moto yango amonisi bosepeli, topesa bandimbola mosusu ya sikisiki oyo etali mikolo ya nsuka.
3 Soki tolobelaki Bokonzi ya Nzambe na bokutani na biso ya liboso, tokoki kopona kokoba lisolo na kotunáká motuna oyo:
◼ “Na makanisi na yo, boyangeli ya lolenge nini ebongi mpenza mpo na kokokisa bamposa nyonso ya bato? [Tótika moto yango ayanola. Tótánga Yilimia 10:23.] Emonani polele ete mokano ya Nzambe ezali soko moke te ete moto atambwisa bomoi na ye engebene ye moko. Mikakatano na biso mingi miuti na likambo oyo ete bato balingi komitambwisa bango moko kozanga lisalisi ya Nzambe. Bokonzi ya Nzambe ezali boyangeli bobele moko oyo ezali na likoki ya kokokisa bamposa na biso.” Tófungola na lokasa 339 ya buku Comment raisonner, mpe tótalela mikapo oyo mizwami na nse na motó na likambo moke ya mibale. Tókoba lisolo na komonisáká ntina oyo tokoki kotya elikya na biso nyonso epai na Nzambe.
4 Tokolinga mbala mosusu komeka likanisi oyo mpo na kobanda lisolo na Biblia:
◼ Tólakisa elilingi ya lokasa 302 ya mokanda Emoniseli: kokokana na yango, mpe tóbakisa ete: “Bato bakofanda kati na bizalela motindo oyo ntango mokano ya Nzambe ekosalema na mabele lokola yango ezali kosalema na likolo. Nzokande, basusu bazali kobanga na kokanisáká ete mabe makozonga. Yango ekosalema soko moke te, mpamba te bato nyonso ya mabe bakolongolama.” Tótánga Nzembo 37:10, 11. Tóbyanga molobani na biso na kozwa litomba na boyekoli ya Biblia oyo Batatoli ya Yehova bazali kopesa na moto nyonso oyo alingi, mpo na koyeba makambo mingi lisusu.
5 Soki totikaki trakte “Bomoi ya kimya kati na mokili ya sika,” tokoki kolakisa elilingi mpe na nsima kotánga paragrafe ya liboso oyo ezwami na nse na motó na likambo moke “Bomoi kati na mokili na sika ya Nzambe,” mpe kobakisa ete:
◼ “Soki tolingi kofanda na mokili motindo wana, ezali na eloko moko ya ntina oyo tosengeli kosala.” Tótánga paragrafe ya nsuka ya trakte yango mpe tólakisa buku Emoniseli: kokokana na yango.
6 Lokola mokano na biso ezali ya kobanda boyekoli ya Biblia, tosengeli kosala bozongeli ya sika oyo ebongi. Tótya yango kati na manaka na biso, mpe tómibongisa malamu. Ndenge yango, tokokoka mpenza kosalisa bato ya bosembo.—Emon. 22:6, 7.