Baboti​​​—Bóbongisa bana na bino na mosala ya kosakola

¹ Masangá na biso mazali na esengo ya kozala na bana oyo bazali komonisa mposa ya kosalela Nzambe. (Mos. 12:1) Bazali kati na baoyo bazali kozwa libyangi ya kosanzola Yehova. (Nz. 148:12-14) Mpe kobongisama oyo baboti bazali kopesa bana na bango mokolo na mokolo esengeli, kati na makambo yango, kobongisa bango mpo na koyambola kondima na bango epai na bato mosusu na mosala ya kosakola.​​​—Det. 6:6, 7.

² Tóbongisa bana na biso mokemoke: Bana basengeli kobongisama uta bazali naino mike mpenza ete bákendaka elongo na baboti na bango na mosala ya kosakola. Liboso ya kosangana na mosala ya kosakola, tóbongisa bana na biso ete básangana mpenza na yango. Tóbanda komonisa bango polele eloko oyo tozali kozela epai na bango wana tokosakola ndako na ndako. Bana ya mike mpenza bakoki kokabola trakte to nkasa ya libyangi mpe kosɛnga na bato ete báya na Ndako ya Bokonzi. Tokoki kosɛnga na bana mike oyo bayebi kotánga malamu ete bátánga mikapo ya Makomami. Bakoki kokabola bazulunalo na maloba ya pɛtɛɛ. Na meko oyo bazali kokóma na makoki, tólakisa bango lolenge ya kosalela Biblia na bokɔti na bango ya masoló. Bilenge basakoli mingi bazali kokabola ntango nyonso bazulunalo epai na bato mpe bazali kosala bozongeli ya sika. Ezali malamu ete elenge abima elongo na mokóló na esika ete abima elongo na elenge moklisto mosusu. Mokóló akoki kolimbola na molobani na bango ete mwana azali kobongisama mpo na mosala ya kosakola.

³ Mwana moke moko ya mwasi asɛngaki na bankulutu ete básalisa ye mpo ete akokisa masɛngami ya kokóma mosakoli ya Bokonzi. Azalaki bobele na mibu 5 na ntango yango mpe ayebaki kotánga te, atako bongo azalaki na makoki ya kolakisa nsango ya Bokonzi ndako na ndako. Ayebaki mikapo ya Makomami, mpe azalaki kofungola Biblia na bisika yango, mpe azalaki kosɛnga na molobani na ye ete atánga yango mpe azalaki kopesa ndimbola.

⁴ Na ndakisa na bango, baboti basengeli koteya bana na bango ntina ya komibongisa malamu mpo na kosangana ntango nyonso na mosala ya kosakola. Ezali likambo ya ntina ete básala manáka ya malamu ya mokolo na mokolo mpo na mosala ya kosakola mpe bátosa yango, mpo ete bana báyeba ntango nini kati na pɔ́sɔ ebongisami bobele mpo na mosala ya kosakola.

⁵ Soki bana bazali koyekola uta bolenge mpenza kolinga mosala ya kosakola mpe kosangana na yango, bakopusama ete bákóla mpo na kozwa, na mikolo mizali koya, mikumba minene mpe, ntango mosusu, kobanda mosala ya mobongisi-nzela. (1 Kol. 15:58) Tosengeli biso nyonso kolendisa bana oyo tozali na bango esika moko ete bákóla mpo na nkembo ya Yehova.