Bankulutu bazali kotambwisa lisangá—Mikumba ya mokɛngɛli na Eteyelo ya mosala ya Teokrasi
1 Mokɛngɛli na Eteyelo ya mosala ya Teokrasi azali nkulutu oyo azali kosala mosala mingi na elimo kati na liloba mpe na koteya. Ebongi mpenza ete tókumisa ye mpe tósala na ye elongo. (1 Tim. 5:17) Wapi mikumba na ye?
2 Atalelaka bibliotɛkɛ ya Eteyelo ya mosala ya Teokrasi oyo ezalaka na Ndako ya Bokonzi. Asepelaka kolendisa baoyo nyonso bakokisi masɛngami ete bákomisa nkombo na Eteyelo ya mosala ya Teokrasi. Asɛnzɛlaka ete badosye ezala na molɔngɔ na boye ete mikumba ya banakelasi ekabolama malamu liboso ya pɔsɔ soko misato. Asengeli koyeba lisangá malamu, koyeba mwanakelasi mokomoko mpe makoki na ye. Ata soki ndeko mosusu asalisaka ye mpo na kobongisa manaka ya eteyelo, atalelaka yango ye moko mpo na koyeba soki mikumba ya banakelasi ekabolami na lolenge ebongi.
3 Mpo na koteya malamu na Eteyelo, mokɛngɛli na Eteyelo asengeli komibongisa malamumalamu pɔsɔ na pɔsɔ, na koyekoláká na mozindo masolo oyo makosalema. Yango ekosalisa ye na kosala ete lisangá ezala malamu ntango nyonso. Ekosalisa mpe ye na koyeba soki masolo masalemi malamu mpe kolobela polele makanisi ya ntina oyo makosalelama na bozongeli ya kokoma.
4 Nsima ya lisolo mokomoko, mokɛngɛli na eteyelo akopesa longonya na mwanakelasi mpe akomonisa polele mpo na nini likambo boye to boye oyo esɛngamaki esalelami malamu, to mpo na nini esengeli kobongisa yango. Soki mwanakelasi moko azali na mposa ya kozwa lisalisi mpo na kobongisa malamu mokumba na ye na eteyelo, mokɛngɛli na eteyelo to ndeko mosusu oyo ye akopona akosalisa ye.
5 Mpo na kozwa mpenza matomba na mosala makasi ya mokɛngɛli na Eteyelo ya mosala ya Teokrasi mpe bandeko mosusu oyo basalaka na litambwisi na ye, tosengeli koyangana mbala na mbala na Eteyelo ya mosala ya Teokrasi. Tosengeli mpe kosalaka mikumba na biso nyonso oyo bapesi biso. Mpe, kosalela toli oyo tozali kozwa to oyo bapesi na banakelasi mosusu. Na lolenge wana, tokobongisa mokemoke makoki na biso ya koteya nsango ya Bokonzi liboso ya bato mpe na ndako na ndako.—Mis. 20:20; 1 Tim. 4:13, 15.