Tózwa matomba na manaka ya Eteyelo ya mosala ya Teokrasi na mobu 1999
1 Yesu azalaki Moteyi Monene. Bato ‘bakamwaki na lolenge na ye ya koteya.’ (Mko. 1:22) Atako moto moko te kati na biso akoki koloba mpe koteya lokola Yesu, kasi tokoki kosala milende ya komekola ye. (Mis. 4:13) Mpo na kosala bongo, mikumba na biso na Eteyelo ya mosala ya Teokrasi ekosalisa biso ete tókoba kokolisa makoki na biso ya koloba mpe ya koteya.
2 Na mobu 1999, mokumba ya mwanakelasi No. 1 ekouta mingi mpenza na masolo ya bazulunalo Linɔ́ngi ya Mosɛnzɛli mpe Lamuká! oyo ebimaki na mobu 1997. Tokoyeba makambo yango ya elimo malamumalamu soki tokotánga masolo yango liboso mpe soki na nsima tokolanda yango na makita na Eteyelo ya mosala ya Teokrasi. Bandeko oyo bakopesamela mokumba yango basengeli kolobela makambo oyo mabongi mpo na lisangá. Bakolobela yango na lolenge ya malamu mpe na mɔ́tɔ. Mokumba ya mwanakelasi No. 3 ekouta na buku Bolamu na libota mpe mokumba ya mwanakelasi No. 4 ekolobela moto moko ya Biblia. Nzokande, mokumba ya mwanakelasi No. 3 ekoki mpe kotalela moto moko oyo alobelami na Biblia, ndenge moko mpe mokumba ya mwanakelasi No. 4 ekoki mpe kouta na buku Bolamu na libota. Mokɛngɛli na eteyelo asengeli kotalela masolo yango malamumalamu liboso ya kopesa yango na banakelasi. Banakelasi nyonso oyo bakopesamela mikumba oyo euti na buku Bolamu na libota, basengeli kozala ndakisa malamu kati na mabota na bango.
3 Salelá pwɛ oyo basɛngi yo mpe omibongisa malamu: Moto nyonso akoki kokolisa makoki ya koloba mpe ya koteya. (1 Tim. 4:13) Na yango, tosengeli koluka toli kasi tópɛngolaka yango soko moke te. (Mas. 12:15; 19:20) Koteya solo malamumalamu na makita mpe na mosala ya kosakola esɛngaka bobele kolobela masolo te to kotánga bavɛrsɛ te. Tosengeli kosimba mitema ya bayoki na biso. Tokoki kosala yango na kolobáká solo oyo euti na motema na biso mpe kopusa bango ete básalela mateya yango. (Kokanisá na Misala 2:37.) Toli oyo tozwaka na Eteyelo ya mosala ya Teokrasi ekosalisa biso ete tókokisa mokano yango.
4 Bobele na ntango oyo bapesi yo mokumba, kanisá pwɛ oyo osengeli kosala lokola yango emonisami na Mokanda mpo na Eteyelo. Talelá makambo oyo osengeli kosala mpo na kosalela toli oyo ozwaki liboso. Manyolá likoló na motó ya likambo ya lisolo na yo, kadre oyo okosalela soki yango esɛngami, mpe lolenge okosalela bavɛrsɛ oyo ezwami na lisolo na yo. Kanisá na mozindo lolenge malamu ya kosalela makambo yango mpo na koteya mpe kosimba mitema.—1 Tim. 4:15, 16.
5 Soki obangaka kokomisa nkombo na Eteyelo ya mosala ya Teokrasi, bondelá na ntina na yango mpe na nsima sololá na mokɛngɛli na Eteyelo. Moto nyonso akoki kozwa matomba na kosimbáká mpenza manaka oyo ekosalelama na Eteyelo ya mosala ya Teokrasi na 1999.