Béngá bango báya

¹ Libyangi moko epesamaki mpo na mbala ya liboso esili koleka bikeke mingi, ezali sikoyo koyokana na bikólo 233 na mokili mobimba: ‘Yakani, tóbuta na ngomba ya Yehova, . . . ete alakisa biso nzela na ye, mpe ete tótambola na bipai bikokendaka ye.’ (Yis. 2:3) Komema bato na ebongiseli ya Yehova ezali lolenge eleki malamu oyo tokoki kosalisa bango ete bákola na elimo kati na nzela ya bomoi ya seko.

² Basakoli mosusu bakakatanaka mpo na kobénga bato na Ndako ya Bokonzi, bazelaka ete bato yango bápusana naino na boyekoli na bango ya Biblia. Nzokande, na bantango mosusu bato bakoki kobanda koyangana na makita ya lisangá ata liboso ete bábanda koyekola Biblia. Tosengeli kozela te mpo na kobénga bato mpe kolendisa bango ete báyangana na makita.

³ Tosengeli kosala nini?: Tóyebisa bato mikolo mpe ngonga oyo tosalaka makita na biso. Tóyebisa bango ete tofutisaka bato mbongo te mpo na kokɔta na makita na biso mpe ete tokɔngɔlaka mabonza te. Tólimbola ndenge makita matambwisamaka. Tómonisa ete ezali mpenza kelasi ya Biblia mpe ete moto nyonso akoki kolanda mateya yango na lisungi ya mikanda ya boyekoli mpe moto nyonso akoki kozwa mikanda yango. Bendá likebi na bango likoló na bato ndenge na ndenge oyo bauti na bisika bikeseni mpe bazali koyangana na makita. Tóyebisa bango lisusu ete, bato ya esika oyo bango bafandi bazali mpe koyangana, ezala bana bakoki koya ata soki bazali na mbula nini. Tosengeli kobenga baoyo tozali koyekola na bango Biblia, mpe kopesa lisungi na biso mpo na kosalisa bango ete báyanganaka na makita.

⁴ Moko na makambo ya nsuka oyo ekomami kati na Biblia ezali libyangi ya mɔ́tɔ mpo na kozwa matomba na bibongiseli oyo Yehova asili kozwa mpo na bomoi: “[Elimo, NW] mpe mwasi na libala balobi ete, Yaká! . . . Tiká ete moto na mposa na komɛla aya, mpe oyo azali na mposa akamata mai na bomoi lokola likabo.” (Emon. 22:17) Tótika soko moke te kobénga bato ete báyangana na makita na biso. Lolenge mosusu ya kosala ezali te.

⁵ Na esakweli oyo ezali na Yisaya 60:8, bamilio ya basanzoli oyo bazali koya sika na lisangá ya Nzambe mpo na kosanzola ye bazali ‘kopumbwa likoló lokola lipata mpe lokola bibenga kino maninisa na bango.’ Biso nyonso tokoki kobénga bato ete báya na makita na biso mpe tóyamba bango malamu. Na kosaláká bongo, tokosala elongo na Yehova wana ezali ye koyeisa mbango mosala ya koyanganisa.​—Yis. 60:22.