Kotika kosakola te!
1 Mokano ya Nzambe ezali ete “bato [ya lolenge, NW ] nyonso bábika mpe ete bákóma na boyebi koyeba solo.” (1 Tim. 2:4) Yango wana, apesi biso mokumba ya kosakola nsango malamu. (Mat. 24:14) Soki toyebi ntina oyo tosengeli kokoba kosakola, tokotika te ete bolɛmbu to makambo mosusu oyo tozali kokutana na yango epekisa biso.
2 Mpo na nini tosengeli kolendendela? Ezali na makambo mingi na mokili oyo ezali kosala ete bato bábosana to bázwa na lisɛki makambo oyo tozali koyebisa bango. Na yango tosengeli koyebisa bango mbala na mbala nsango ya Nzambe oyo ekopesa lobiko. (Mat. 24:38, 39) Lisusu, bomoi ya bato ezali ntango nyonso kobongwana. Ata mpe makambo ya mokili ekoki kobongwana na mbala moko lelo to lobi. (1 Kol. 7:31) Ntango mosusu, bato oyo tosololi na bango lelo, lobi to nsima ya pɔsɔ moko to nsima ya sanza mobimba, bakoki kokutana na mikakatano to na mitungisi oyo ekotinda bango bátya likebi na nsango malamu oyo tozali komemela bango. Na ntembe te, ozali mpenza na botɔndi mpo Motatoli oyo ateyaki yo solo alɛmbaki te, boye te?
3 Mpo na komekola motema mawa ya Nzambe: Yehova atiki ntango liboso ya kopesa bato mabe etumbu. Na nzela na biso, azali ntango nyonso kobenda bato ya motema sembo báya epai na ye mpe bábika. (2 Pet. 3:9) Tokomema nyongo ya makila soki tosakoleli bato te nsango ya motema mawa ya Nzambe mpe soki topesi likebisi te mpo na etumbu oyo etikali moke Nzambe apesa bato nyonso oyo bazali koboya kotika misala na bango ya mabe. (Ezek. 33:1-11) Ata soki bato bazali ntango nyonso te koyamba biso na mosala na biso ya kosakola, tosengeli soko moke te kolɛmbisa milende oyo tozali kosala mpo na kosalisa bato ya motema sembo ete bámonisa botɔndi na bango na motema mawa ya Nzambe.—Mis. 20:26, 27; Lom. 12:11.
4 Mpo na komonisa bolingo na biso: Ezali Yehova, na nzela ya Yesu Klisto, nde apesaki biso etinda ya kosakola nsango malamu na mokili mobimba. (Mat. 28:19, 20) Ata soki bato bazali koboya koyoka, tozali na libaku ya komonisa bolingo na biso mpe bokangami na biso na Nzambe wana tozali ntango nyonso kosala oyo ezali sembo.—1 Yoa. 5:3.
5 Tiká ete tózala ntango nyonso na mokano ya kotika te kosakola! Tósala yango na molende lokola tozali naino na ‘mokolo ya kobikisa’ ya Yehova.—2 Kol. 6:2, NW.