Tiká ete biso nyonso tókumisa Yehova mpe Mwana na ye
Ndenge nini bato nyonso oyo bakoyangana na Ekaniseli na mokolo ya 8 Aprili bakoki mpenza kozwa litomba mingi?
1 Banani bazali mpenza kozwa lokumu lelo oyo? Ezali bongo baoyo bato ya mokili bamonaka ete misala na bango ezali na lokumu mingi. Nzokande, mbala mingi, bato babosanaka nokinoki misala yango. Kasi ezali boni mpo na misala oyo ezali mpenza komemela bato nyonso litomba? Mosala monene oyo ekomemela bato litomba mingi ezali oyo tokotyela yango likebi ntango tokosala Elambo ya Mpokwa ya Nkolo, nsima ya kolala ya moi na mokolo ya 8 Aprili 2001.
2 Nani abongi kozwa lokumu koleka? Biblia epesi eyano: “[Yehova], . . . obongi kozwa nkembo, na lokumu, na nguya, mpo ete yo ozalisaki biloko nyonso.” (Emon. 4:11) Lokola azali Mozalisi, Yehova azali Mokonzi Monene ya molɔ́ngɔ́ mobimba. Lotomo na ye ya kozwa lokumu ekosuka ata mokolo moko te!—1 Tim. 1:17.
3 Yesu Klisto, Mwana ya Nzambe, asalaki misala ya ntina oyo ekomemela bato mapamboli libela na libela. Amekolaki Tata na ye mpenzampenza. (Yoa. 5:19) Botosi na ye ya solosolo mpe mosala na ye ya sembo esalaki ete “abonga na kozwa nguya, na misolo, na mayele, na makasi, na lokumu, na nkembo, na [mapamboli, NW ].” (Emon. 5:12) Tata na ye apesaki ye lokumu na ndenge atyaki ye Mokonzi. (Nz. 2:6-8) Mpo na biso, tokozwa libaku ya kokumisa Tata mpe Mwana ntango tokosala Elambo ya Mpokwa ya Nkolo na mokolo ya 8 Aprili 2001.
4 Likambo ya mawa, na lisolo mobimba ya bato bobele bato moke nde bapesaki Yehova na Mwana na ye lokumu oyo ebongi na bango. Na ntango ya kala, ata basaleli ya Nzambe, Bayisalaele, bazalaki kosalela Yehova mosala kaka likolólikoló. Yango ezalaki mpenza kozanga botosi na nko. (Mki. 1:6) Limemya oyo ebongi esɛngi kozala na botosi ya sembo oyo euti na bolingo mpe na botɔndi mpo na makambo nyonso oyo Yehova na Mwana na ye basalaki mpo na biso. Soki tozali komonisa lokumu mpe botosi motindo wana ekomonisa ete tobangaka Nzambe mpe tozali na limemya mpo na ye, mpe ete tozali kotalela Yehova na Yesu na banzela na biso nyonso. Lisangá ya boklisto ezali kosala makasi mpo na koteya mpe kosalisa bato mosusu ete básala mpe bongo.
5 Libaku ya ntina mingi ya komonisa lokumu: Mbula na mbula, Ekaniseli ezalaka ntango ya ntina mingi oyo basaleli ya Yehova bayanganaka elongo. Moto nyonso oyo azali na mposa ya kosalela Yehova mpe kokumisa ye asengeli kozala wana. (Luka 22:19) Tondimi ete longola bato milio 6 oyo bazali Batatoli, ekozala mpe na bato mingi oyo bazali kosepela na solo, oyo bakoyangana mpe yango ekoki kosala ete bayangani báleka milio 14. Oyo nde libaku malamu tozali na yango ya kokumisa Tata na biso ya likoló! Atako Ekaniseli yango ezali kolobela mingi Yesu, kasi lokumu mpe limemya oyo tokomonisa mpo na oyo asalaki ekokumisa Tata, oyo atindaki ye.—Yoa. 5:23.
6 Tosengeli kosala nini mpo na kopesa mabɔkɔ na libaku oyo ya ntina mingi? Tokoki kosalisa bato ya sika bázwa mpenza litomba mpo na yango. Tólendisa bango báyangana, mpe soki yango esengeli tokoki kosalisa bango mpo na kokende na bango tii esika Ekaniseli ekosalema. Limbolelá bango ntina ya lisukulu yango. Lakisá bango bandeko mosusu. Makambo oyo bakomona mpe oyo bakoyoka ekoki kotinda bango báluka kosangana na biso mpo na kokumisa Yehova.
7 Kokanisa te ete programe yango ekosala bopusi kaka moke. Moyekoli moko ya iniversite alobaki boye: “Nakendá na misa mbala na mbala na lingomba na ngai, kasi oyo ekeseni mpenza. Namoni, oyo ezali mpenza ndenge Biblia elobi, mpe nakanisi bozali na kati ya solo.” Abandaki koyangana na makita pɔsɔ na pɔsɔ mpe aumelaki te kozwa batisimo.
8 Tósalisa bato ya sika bákola: Komá bankombo ya bato ya sika oyo bayangani na Ekaniseli mpe kende kotala bango nokinoki mpo na kozongisa lisusu na makanisi na bango makambo ya kobɔndisa oyo bayekolaki mpe oyo bamonaki. Yebisá bango programe ya makita mosusu, epai bakoki kokolisa boyebi na bango ya Biblia. Soki bolobeli makambo oyo ezali na mokapo 17 ya buku Boyebi oyo ezali na motó ya likambo “Tóluka kobatelama kati na libota ya Nzambe,” ekomonisa bango bibongiseli ndenge na ndenge ya elimo oyo ezali kosalema na lisangá, oyo bango mpe bakoki kozwela yango matomba. Omibongisa mpo na kolakisa bango kasɛti video Our Whole Association of Brothers (Libota mobimba ya bandeko) mpo bákoka komona na miso na bango moko, bomoko, esengo, mpe molende ya basaleli ya Yehova!
9 Ezali na ntina ete bato oyo bazali kosepela na solo báyekola ndenge oyo bakoki komonisa lokumu mpe limemya epai ya Yehova. Limbolelá bango ete mabondeli oyo euti mpenza na motema esepelisaka Yehova mpe yango nde ebɔndisaka. (1 Yoa. 5:14) Salelá liteya 8 kino 12 na mwa buku Azali kosɛnga, mpo na komonisa lolenge ya etamboli oyo esepelisaka Yehova. Ntango bozali kolobela makambo oyo ezali na mwa buku Batatoli ya Yehova, lokasa 30-31, lendisá bato ya sika bákanisa ndenge oyo bakoki kokumisa Yehova na kobimáká na mosala ya kosakola.
10 Botɔndi mpo na mbeka ya Yesu mpe mpo na libaku malamu oyo tozali na yango ya kosala lokola bayekoli na ye ekumisaka Tata mpe ememelaka bato mosusu mapamboli. Yesu apesaki elaka oyo: “Soko moto akosalela ngai, Tata akokumisa ye.”—Yoa. 12:26.