Mapamboli oyo eutaka na komonisa botɔndi mpo na bolingo ya Yehova—Eteni 2
1 Eteni ya liboso ya lisolo oyo ebimaki na sanza eleki, emonisaki ndenge minei oyo tokoki komonisa botɔndi mpo na bolingo ya Yehova na mosala ya kosakola. (1 Yoa. 4:9-11) Eteni oyo ya mibale ebakisi makambo mitano mosusu oyo tokoki kosala mpo na komonisa botɔndi yango. Soki tomipesi mpenza mpo na kosalisa bato mosusu na elimo, tokozwa matomba.
2 Litatoli ya libaku malamu: Yango ezali lolenge malamu ya kokutana na bato oyo bazali na nzala mpe na mposa ya bosembo mpe ya kopesa bango mikanda oyo ekosalisa bango. Ezali na ntina ete ‘tómisombelaka ntango oyo ebongi’ mpo tópesaka litatoli na libaku nyonso emonani epai ya moto nyonso oyo tokutani na ye. (Ef. 5:16, NW) Ntango mosusu ekosɛnga ete tózala na mpiko mpenza mpo na kopesa litatoli ndenge wana, kasi soki tozali komonisa botɔndi mpo na bolingo ya Nzambe mpe soki toyebi mposa ya bato, yango ekotinda biso tópesa litatoli na libaku nyonso.—2 Tim. 1:7, 8.
3 Misionɛrɛ moko abandaki lisolo na moto moko oyo azalaki na ye na kati ya taksi, mpe yango ebotaki mbuma malamu. Moto yango asepelaki mingi. Misionɛrɛ yango azongelaki moto yango mbala na mbala na ndako na ye, mpe babandaki koyekola Biblia. Moto yango ayambaki solo mpe akolaki malamu kino akómaki nkulutu na kati ya lisangá!
4 Kokoma mikanda: Ekoki kozala ete ozali na likoki ya kokende ndako na ndako te mpo ozali lisusu na likoki ya kotambola te to mpe mpo moi ezali makasi to malili eleki to mbula ezali kobɛta. Okoki kokoma mikanda mpo na kopesa litatoli ya mokuse epai ya bato oyo oyebi, epai ya baoyo bakufeli moto, to epai ya baoyo bazalaki na bandako na bango te ntango okendaki kotala bango. Okoki kokɔtisa trakte moko oyo ebongi, oyo mpe ezali na nsango moko malamu oyo euti na Biblia mpe okoki koyebisa moto oyo akotánga mokanda yango ete akomela yo soki azali na mituna ya kotuna. Mpo na yango, osengeli kosalela adresi na yo moko to adresi ya Ndako ya Bokonzi na bino, tosɛngi yo ete osalela adresi ya Biro te.
5 Litatoli na telefone: Yango ezali lolenge malamu ya kosolola na bato oyo tokokaka kokutana na bango te ntango tozali kosala mosala ya ndako na ndako. Soki tosali yango na mayele mpenza, na boboto mpe na bokɛngi, tokoki kozwa eyano ya malamu mpenza. Mosala na biso ya Bokonzi ya Febwali 2001, na nkasa 5-6 epesi makanisi ya malamu oyo tokoki kosalela mpo na kozwa mbuma ya malamu mpenza.
6 Ndeko mwasi moko oyo azalaki kopesa litatoli na telefone atunaki mwasi moko soki azwaki ntango ya kokanisa mpo na oyo etali avenire na ye mpe oyo ya libota na ye. Mwasi yango andimaki mpe alobaki ete lokola ayebaka te soki akoki kosala nini, yango wana alingaka kaka kozala ye moko na ndako na ye. Lokola amonaki ete ndeko mwasi yango azalaki mpenza komitungisa mpo na bolamu na ye, mwasi yango andimaki kokutana na ye na mwa wenze moko ya pene wana. Yango esalaki ete mwasi yango andima na esengo koyekola Biblia!
7 Koyamba bapaya: Soki tolingaka bato, tokoyeba moto nyonso ya sika oyo ayei na makita mpe tokoyamba ye na esengo mpenza. (Lom. 15:7, NW) Tosengeli komonisa ye ete azali na kati ya bato oyo balingi ete akola malamu na elimo. Soki amoni ete tolingi mpenza bolamu na ye mpe ndenge tokolendisa ye andima koyekola Biblia, nyonso wana ekoki kotinda ye andima lisalisi oyo tolingi kopesa ye.
8 Etamboli na biso ya malamu: Etamboli na biso ya malamu ekómisaka mateya ya solo kitoko. (Tito 2:10, NW) Ntango bato balobaka malamu mpo na biso Batatoli ya Yehova, bapesaka nde lokumu epai ya Nzambe na biso. (1 Pet. 2:12) Yango mpe ekoki kosala ete bato bábanda kolanda nzela ya bomoi.
9 Mpo na nini te kotalela lisusu makambo mitano oyo touti kolobela, oyo ezali kolakisa ndenge ya komonisa botɔndi na biso mpo na bolingo mingi oyo Yehova amonisaka mpo na biso mpe mpo na nini te kosalela makambo yango? (1 Yoa. 4:16) Soki tosali yango, tokozwa mapamboli mingi.