Biyano na mituna na bino

◼ Mpo na nini tosengeli kokeba ntango tozali kokomela bato mikanda mpo na kopesa bango litatoli?

Kokomela bato mikanda mpo na kopesa bango litatoli ezali lolenge moko ya koyebisa bato nsango malamu oyo tosalelaka banda kala, oyo mpe ezali kobota mbuma mingi. Kasi, makambo oyo euti kosalema na mokili ekómi kobangisa bato mpo báfungola mokanda oyo bayebi malamu te moto oyo atindeli bango mokanda yango. Bato bakómi kobanga baanvelɔpɛ oyo esika yango euti eyebani te, to oyo ezali na adrɛsi ya moto oyo atindi yango te, mingimingi soki anvelɔpɛ yango ezali monene mpe soki bakomi likoló na yango na mabɔkɔ. Bato oyo totindeli bango mikanda ya ndenge wana bakoki koboya kofungola yango mpe kobwaka yango. Tokosala nini mpo likambo ya ndenge wana esalema te?

Soki likoki ezali, tosengeli kokoma mokanda na biso na masini, tosengeli mpe kokoma likoló ya anvelɔpɛ na masini. Anvelɔpɛ esengeli kozala na nkombo ya moto oyo totindeli ye mokanda. Likoló na yango tókoma te ete: “Epai ya mokóló-ndako.” Longola yango, tóbosanaka te kotya adrɛsi na biso. Soki tomoni ete kotya adrɛsi na biso ekozala malamu te, tótya nkombo na biso mpe adrɛsi ya Ndako ya Bokonzi. Tótinda mokanda te kozanga kotya nkombo na biso. Tosengeli soki moke te kosalela adrɛsi ya biro ya filiale.​—⁠Talá Biyano na mituna na bino na Mosala na biso ya Bokonzi ya Desɛmbɛ 1996.

Okokuta makanisi mosusu oyo etali ndenge ya kokoma mikanda ya lolenge yango na kati ya Mokanda mpo na Eteyelo ya mosala ya Nzambe, nkasa 84-90. Malako oyo ekosalisa biso tókomaka mikanda oyo ekokómisa mpenza nsango malamu epai ya bato mosusu.