Biyano na Mituna na bino

◼ Tosengeli kosɛnzɛla na likambo nini wana tozali kotinda nkomá epai ya bato oyo tokutaka bango te na bandako na bango?

Mpo na bantina ndenge na ndenge, tomonaka ete ezali mpasi mingi kokuta bato epai na bango. Basakoli mosusu bamonaka malamu kotindela bango nkomá, mpe lolenge wana ya kosala ekoki kobimisa matomba malamu; nzokande, ezali likambo ya ntina ete tómikundola mwa makambo oyo makopɛngwisela biso mikakatano:

Tósalela adrɛsi ya la Société te. Yango ekopesa likanisi ete nkomá yango euti na biro na biso, yango ekobimisa mikakatano mpe ekoki kosɛnga ete mosolo mobimisama mpambampamba.

Tóndimisama ete adrɛsi ya moto oyo totindeli ye nkomá ezali ya sikisiki mpe tɛmbɛlɛ ya pósita efutami malamu.

Tótinda te nkomá epai na moto kozanga kotya nkombo na ye.

Tótika nkomá na minɔkɔ ya ndako te.

Nkomá ya mikuse izali malamu mingi koleka. Na esika ya kotindá nkomá molaimolai, esika moko na nkomá tótya trakte to zulunalo moko.

Nkomá oyo ebɛtami na masini ezalaka pɛtɛɛ mingi mpo na kotánga mpe bato basepelaka na yango mingi koleka.

Nkomá oyo totindeli moto ekotángama te lokola bozongeli ya sika longola bobele soki liboso topesaki litatoli epai na moto yango na komonáká ye na miso.

Soki totindi nkomá epai na moto oyo asilaki komonisa bosepeli, tosengeli koyebisa adrɛsi to nimero ya telefone epai ye akoki kozwa biso. Tópesa manáka na biso ya boyekoli ya Biblia.

Tóbyanga moto yango na makita ya lisangá, na koyebisáká na bosikisiki nyonso adrɛsi mpe ngonga.

Tótinda lisusu te nkomá epai na bato oyo bazalaki te nsima wana tosili kozongisa teritware; ezali mosakoli oyo apesameli teritware yango sikawa nde asengeli kosakola kuna.