Yebá kosolola malamu na bato!
1 Mpo na kokokisa mokumba na biso ya kosakola mpe ya kozalisa bayekoli, tosengeli kosolola na bato. (Mat. 24:14; 28:19, 20) Kosolola na bato, ata na baninga, ezalaka ntango mosusu mpasi. Makambo nini ekoki kosalisa biso tókoka kosolola na bato oyo bayebi nsango malamu te?
2 Tómonisa ete tozali baninga: Tómeka komitya na esika ya bato oyo tozali kokutana na bango na mosala ya kosakola. Na ndenge mokili ekómi lelo oyo, tokoki kokamwa te soki bato mosusu bazali kotyela bato oyo bango bayebi te makanisi mabe, to bazali kobanga bango. Yango wana ntango mosusu ezalaka mpasi mpo na kosolola na bato. Ndenge nini tokoki kolongola mwa kobanga oyo bato bazalaka na yango ntango tokutani na bango mbala ya liboso? Liboso kutu tóyebisa bango ata likambo nini, elateli na biso ya mindɔndɔ te ezali lolenge moko ya kosolola na bato. Molato na biso ya malamu mpe ezaleli na biso ya limemya ekoki kosalisa bango bábanga biso te.—1 Tim. 2:9, 10.
3 Likambo mosusu oyo ekosalisa biso tósolola malamu na bato ezali soki tozali kobanga te mpe tomonisi ete tozali baninga. Yango esalisaka basusu bámiyoka malamu mpe etindaka bango bázala na mposa ya koyoka biso. Komibongisa malamu liboso ezali na ntina mingi na likambo oyo. Soki toyebi malamu likambo nini tokoloba, tokobanga mpenza te. Mpe kimya ya motema wana oyo tokozala na yango ekoki kopesa bato mposa báyoka nsango oyo tomemeli bango. Mwasi moko alobaki boye ntango Motatoli moko akendeki kotala ye: “Likambo oyo nakobosana te ezali kimya oyo ezalaki komonana na elongi na ye ya koseka. Ebendaki mpenza likebi na ngai.” Yango epesaki mwasi yango nzela ayoka nsango malamu.
4 Bizaleli oyo ekobenda bato: Tosengeli komibanzabanza mpenza mpo na basusu. (Filp. 2:4) Lolenge moko tokoki kosala yango ezali soki tozali mpe kotikela moto yango ntango aloba. Kutu, kosolola esɛngaka mpe koyoka. Ntango tozali kotikela bato oyo bazali koyoka biso nzela ete bábimisa makanisi na bango mpe tozali koyoka na likebi nyonso oyo bazali koloba, bamonaka ete tozali komibanzabanza mpo na bango. Yango wana, ntango bato oyo bazali koyoka biso bazali koloba, tózala motema mɔ́tɔmɔ́tɔ te mpo tózongela lisolo oyo tobongisaki. Tópesa bango longonya na bosembo mpenza soki ebongi, mpe tómeka kosalela makambo oyo bauti koloba mpo na kokoba lisolo. Soki maloba na bango ezali komonisa makambo mosusu oyo etungisaka bango, tóbongola lisolo oyo tobongisaki mpo na kolobela makambo yango oyo ezali kotungisa bango.
5 Bopɔlɔ mpe ezaleli ya komikitisa epesaka nzela ete bato básolola malamu. (Mas. 11:2; Mis. 20:19) Bato bazalaki kopusana pene na Yesu mpo azalaki “na elimo ya boboto mpe na komikitisa na motema.” (Mat. 11:29, NW) Nzokande, komilakisa ebenganaka bato. Na yango, atako toyebi mpenza ete biso nde tozali na solo, tokoboya kosolola na bato na ndenge moko ya makasimakasi.
6 Bongo soki maloba ya moto emonisi ete azali na bindimeli oyo eyokani te na mateya ya Biblia? Esengeli kaka tósembola ye? Ɛɛ, nsima ya mwa ntango. Kasi tosengeli te koluka kosala yango kaka na ntango tokutani na ye mbala ya liboso. Mbala mingi, ezalaka malamu mingi kosolola liboso makambo oyo tozali kondima biso nyonso liboso ya komonisa ye solo ya Biblia oyo ntango mosusu ekozala mpasi mpo andima yango. Yango esɛngaka kozala na motema molai mpe kozala na mayele. Paulo apesi ndakisa malamu mpenza na likambo yango ntango apesaki litatoli liboso ya basambisi na Ngomba ya Ale.—Mis. 17:18, 22-31.
7 Libosoliboso, bolingo ya solosolo ekosalisa biso tóyeba kosolola malamu. Lokola Yesu, tosengeli koyoka mawa mpo na bato oyo ‘batikami mpamba mpe bapalanganisami lokola bampate ezangá mobateli.’ (Mat. 9:36, NW) Yango nde etindaka biso tómemela bango nsango malamu mpe tósalisa bango bákóma na nzela oyo ememaka na bomoi. Nsango na biso ezali nsango moko ya bolingo, na yango tiká ete tólanda koyebisa yango bato na bolingo mpenza. Soki tosali bongo, tokomekola Yehova Nzambe mpe Yesu Klisto—baoyo bayebi kosolola koleka bato nyonso na molɔ́ngɔ́.