Tózwa matomba mingi mpenza na mateya ya liyangani ya etúká “Basakoli ya Bokonzi ya molende”

¹ Programɛ oyo elendisaki mpenza: Oyo nde programɛ ya kolendisa tolandaki na liyangani ya etúká oyo euti koleka! Tosanganaki mpo na mokano se moko, mpo tóyeba lisusu malamumalamu kosakola nsango ya Bokonzi na molende. Ozali koyeba lisusu ndenge molobi ya liboso alimbolaki liloba “kosakola”? Ozali koyeba lisusu makambo oyo lisukulu “Tóbanga te mpo toyebi ete Yehova azali na biso” elendisaki biso tósalela yango bolukiluki? Masolo nini ya bomoi ya bandeko osili kotánga kobanda wana?

² Masukulu-matongani oyo ezalaki na motó ya likambo ete: “Komekama ndenge na ndenge emonisaka motindo ya kondima na biso” elobelaki ntina misato ya minene oyo Yehova atikaka ete minyoko ekómela bato. Okoki kolimbola bantina yango? Mikapo nini ya Biblia etindaka biso tókɔta na makambo ya mokili te? Balendisaki biso tósala nini mpo na komibongisa mpo na komekama oyo ekoki koyela biso mpo tokɔtaka na makambo ya mokili te? Lokola toyikaka mpiko na bosembo mpenza liboso ya komekama, na ndenge nini likambo yango ekumisaka Yehova?

³ Makambo nini ya drame “Kangamá makasi na Yehova na ntango ya mpasi” elendisaki yo mingi mpenza? Ndenge nini tokoki komekola Yilimia?

⁴ Mbongwana nini lisukulu ya bato nyonso, “Makambo ya mokili oyo ezali kobongwana,” emonisaki ete elingi kosalema mpe ete mbongwana yango ekomema tii na mokolo ya nsɔmɔ ya Nzambe? Na ntango ozalaki koyoka lisukulu ya nsuka “Bino basakoli ya Bokonzi ya molende, bótonda na misala malamu,” ndenge nini oyokanisaki makambo oyokaki na mosala na yo ya kosakola?

⁵ Makanisi ya ntina oyo tosengeli kosalela: Lokola balimbolaki yango na lisukulu “Bózalaka na botɔndi,” ndenge nini tokoki komonisa bozindo ya botɔndi na biso epai ya Yehova? Na lisukulu-moboko “Basakoli ya Bokonzi batondi na molende,” balendisaki biso tómekola molende ya nani? Basɛngaki biso tómitalela na makambo nini?

⁶ Wapi masɛngami misato oyo tosengeli kokokisa mpo tóndimama na Yehova oyo masukulu-matongani “Esakweli ya Mika ezali kopesa biso makasi ya kotambola na nkombo ya Yehova,” elobelaki? Moto akoki kokokisa yango? (Mika 6:⁠8) Na kotalela lisukulu “Bateláká motema na yo mpo ozala ntango nyonso na bizaleli ya pɛto,” na banzela nini tosengeli kobatela bopɛto na biso ya bizaleli? Lisukulu “Kebá na bokosi” ekebisi biso bákosa biso te mpe tókosa bato mosusu te na makambo nini?

⁷ Makanisi nini oyo balobelaki na masukulu-matongani “Basakoli ya Bokonzi oyo bazali kokumisa mosala na bango ya baministre,” oyo obandi kosalela na mosala na yo ya kosakola? Na lisukulu “Masolo ya elimo elendisaka,” batalelaki na mozindo mokapo ya Bafilipi 4:⁠8. Ndenge nini vɛrsɛ yango esalisaka biso mpo ete tókóma kosolola masolo ya elimo, mpe tosengeli kosolola yango ntango nini?

⁸ Lisukulu “Tyelá Yehova motema na yo mobimba na ntango ya mpasi” elobelaki ndenge oyo tokoki koyika mpiko ntango bampasi ekweli biso, ntango tozali na mikakatano ya mbongo, ntango nzoto ezali mpenza kolɔngɔnɔ te, ntango tozali na mikakatano na kati ya libota, mpe na bolɛmbu oyo ezali kosila te. Ndenge nini tokomonisa ete tozali kotyela Yehova motema na biso ntango tozali kokutana na makambo ya ndenge wana?

⁹ Biloko ya motuya ya elimo oyo tozwi sika: Toyokaki esengo mingi ya kozwa buku ya sika Tósambela Nzambe kaka moko ya solo. Ndenge nini liyebisi oyo ezalaki kolimbola ntina ya buku yango esimbaki motema na yo? Na ndenge nini ekosalisa biso mingi na mosala na biso ya kozalisa bayekoli ntango tokosalela yango lokola buku ya mibale oyo moto asengeli koyekola?

¹⁰ Nsima na yango, tozwaki buku ya kitoko Tópusana penepene na Yehova. Buku yango ekeseni na babuku mosusu na makambo nini? Wapi bililingi ya buku yango oyo esepelisi yo mingi? Ntango otángaki yango, omiyoki ete opusani pene lisusu na Yehova? Banani lisusu bakoki kozwela buku yango matomba? Tozalaki mpe na esengo ya kozwa Libongoli ya Mokili ya Sika ya Makomami ya Grɛki ya boklisto na Lingala. Ezali esaleli ya ntina mingi mpo na boyekoli ya yo moko mpe mpo na mosala ya kosakola. Ozali na mokano ya kosalela yango ndenge nini?

¹¹ Liyangani ya etúká “Basakoli ya Bokonzi ya molende” elendisaki biso na elimo na ndenge oyo tosengelaki na yango mpo na koyika mpiko na bantango ya mpasi oyo. Mpo na kozwa matomba mpenza na ebongiseli oyo ya elimo, tiká ete tósala nyonso oyo tokoki kosala mpo tóbosana te makambo oyo balobaki kuna, tósepela na nyonso oyo tozwaki, mpe tósalela makambo oyo toyekolaki. (2 Pet. 3:14) Soki tosali bongo, ekosalisa biso tóbatela bosembo na biso mpe tómonisa mpenza ete tozali basakoli ya Bokonzi ya molende, oyo bazali kolanda ndakisa ya Mokonzi na biso Yesu Klisto, nyonso wana mpo na nkembo ya Yehova.​​—⁠Filp. 1:​9-11.