Tóyekola Biblia na bato na lisalisi ya buku Tósambela Nzambe

Ntina ya buku Tósambela Nzambe kaka moko ya solo ezali ya kosalisa bato ya sika bákola kati na solo mpe bákóma na botɔndi mpenza mpo na Yehova mpe mpo na ebongiseli na ye. Buku yango ekoki kozala buku ya mibale oyo tokoyekola na bato. Mosala na biso ya Bokonzi ya sanza ya Yuni 2000, lokasa 4, elobaki boye: “Soki emonani ete moto oyo ozali koyekola na ye azali kokola na elimo, ata soki azali kokola malɛmbɛmalɛmbɛ, mpe azali kosepela na makambo oyo azali koyekola, okoki kolanda koyekola na ye Biblia na buku ya mibale nsima ya kosilisa mwa buku Azali kosɛnga mpe buku Boyebi. . . . Ata ndenge nini, esengeli koyekola liboso mwa buku Azali kosɛnga mpe buku Boyebi. Ata soki moto oyo ozali koyekola na ye azwi batisimo liboso ete asilisa koyekola buku ya mibale, osengeli ntango nyonso kokoma moto yango na lapolo na yo lokola moyekoli ya Biblia, kokoma bozongeli ya sika, mpe ngonga oyo ozali kolekisa mpo na koyekola na ye.”

Nani lisusu bokoki koyekola na ye Biblia na lisalisi ya buku Tósambela Nzambe? Lisolo wana kaka ya Mosala na biso ya Bokonzi elobaki lisusu boye: “Soki oyebi baoyo bayekolaki [mwa buku Azali kosɛnga ná] buku Boyebi kala mpe bakolaki te kino komipesa mpe kozwa batisimo, okoki kotala soki bakolinga kobandela boyekoli na bango ya Biblia.” Na boumeli ya sanza ya Marsi mpe Aprili, tósala milende mpenza mpo na kobanda koyekola Biblia na bato ya ndenge wana na lisalisi ya buku Tósambela Nzambe.