Ebongiseli ya sika mpo na kosala bozongeli ya mayangani
Lokola mokili ya Satana ezali se kobeba, Yehova azali kopesa biso makasi mpo “tóboya ezaleli ya kotyola Nzambe mpe bamposa ya mokili mpe tófanda na makanisi malamu mpe na boyengebene mpe na ezaleli ya kokangama na Nzambe na kati ya ebongiseli ya makambo ya ntango oyo.” (Tito 2:12) Na bibongiseli oyo Yehova azali kozwa na nzela ya “moombo ya sembo mpe ya mayele,” tokoki kotánga, mayangani ya zongazonga mpe ya mokolo moko, oyo esalemaka mbula na mbula. (Mat. 24:45) Mayangani yango elendisaka biso mpenza!
Na mobu ya mosala 2005, tokobanda kosalela ebongiseli ya sika ya kozongela makambo oyo toyokaki na mayangani mpo na kosalisa biso tókanga yango mpe tósalela yango. Nkasa 5 mpe 6 ya siplema oyo ezali na masolo oyo ezali komonisa na mokuse makambo oyo ekolobama na liyangani, ezali mpe na mituna mpo na kosala bozongeli. Masangá ekotalela makanisi yango mwa moke liboso ya kokende na liyangani mpe mwa moke na nsima na yango. Bakosala yango ndenge nini?
Pɔsɔ moko to mibale liboso ya kokende na liyangani ya zongazonga, lisolo moko ya miniti 10 ekosalema na Likita ya mosala, elobi: “Liyangani ya zongazonga ya mbala oyo,” mpo na kotalela makambo oyo ekolobama na liyangani. Molobi akobenda likebi ya bayangani na mituna ya bozongeli mpe akolendisa bato nyonso ete bázwa banɔti mpo na kobongisa bozongeli oyo ekosalema mwa bapɔsɔ nsima ya liyangani.
Mwa bapɔsɔ nsima ya liyangani, bozongeli ya miniti 15 ekosalema na Likita ya mosala mpo na kotalela makambo oyo elobelamaki na mokolo ya liboso ya liyangani. Na pɔsɔ oyo ekolanda, bozongeli ya miniti 15 ekosalema mpo na kotalela makambo oyo elobamaki na mokolo ya mibale. Mituna oyo bokosalela na bozongeli ezali na siplema oyo. Bozongeli esengeli mpenzampenza kolobela ntina ya kosalela makambo yango. Bankulutu bakosala na boye ete masolo ya Likita ya mosala ezala mikuse, bakolongola makambo mosusu to kosala programɛ na ndenge mosusu mpo na kokɔtisa masolo yango ya bozongeli.
Ebongiseli oyo ekosalelama mpe mpo na liyangani ya mokolo moko, kasi bokosala bozongeli ya liyangani mobimba mbala moko na miniti 15. Biso nyonso tosengeli kobomba siplema oyo mpe kosalela yango mpo na kozwa mpenza matomba na mateya kitoko oyo ezali kouta epai ya Yehova.—Yis. 48:17, 18.