Tóbosana te ete mikolo etikali ya kotánga!

¹ Yesu ayebaki ete mikolo oyo azalaki na yango awa na mabele mpo na kokokisa mosala ya Tata na ye ezalaki ya kotánga. (Yoa. 9:⁠4) Yango wana, asalaki mosala na ye nokinoki, mpe alakisaki bayekoli na ye básalaka mpe bongo. (Luka 4:​42-44; 8:1; 10:​2-4) Biloko ya mokili ezalaki na esika ya liboso te mpo na ye. (Mat. 8:20) Na bongo, akokaki kosilisa mosala oyo Yehova apesaki ye asala.​—⁠Yoa. 17:⁠4.

² Mikolo ya kotánga: Mikolo ya kosakola nsango malamu “na mabelé mobimba oyo efandami,” ezali mpe ya kotánga. (Mat. 24:14) Bisakweli ya Biblia emonisi ete tozali kobika na mikolo ya nsuka mpenza ya ntango oyo ya nsuka. Mosika te “baoyo bayebi Nzambe te mpe baoyo bazali te kotosa nsango malamu oyo etali Nkolo na biso Yesu . . . bakozwa etumbu ya lisambisi ya libebi ya seko.” (2 Tes. 1:​6-9) Kosambisama yango ekoya na mbalakaka mpenza. (Luka 21:​34, 35; 1 Tes. 5:​2, 3) Bato basengeli koyeba likama oyo ezali liboso na bango. Ezali mokumba na biso ya kosalisa bango báluka kondimama na Yehova lokola ntango ezali naino. ​—⁠Sef. 2:​2-4.

³ Tósala nyonso oyo tokoki: Basaleli ya Nzambe bayebi ete “ntango oyo etikali ekómi mokuse,” yango wana, batyaka mosala ya kosakola na esika ya liboso. (1 Kol. 7:​29-31; Mat. 6:33) Bamosusu baboyi mabaku oyo bazali na yango ya kokóma bazwi to batiki makambo mosusu oyo bazalaki kosala mpo básakola mingi koleka. (Mko. 10:​29, 30) Bamosusu bazali kokoba kozala “na mingi ya kosala na kati ya mosala ya Nkolo,” atako bazali kokutana na mimekano. (1 Kol. 15:58) Mingi bazali kosakola nsango malamu banda ebele ya bambula kozanga kotengatenga. (Ebe. 10:23) Yehova apesaka motuya mpenza na milende oyo bandeko yango basalaka mpo na kotombola matomba ya Bokonzi. ​—⁠Ebe. 6:10.

⁴ Soki tozali mpenza komipesa na losambo ya Yehova, oyo esangisi mosala ya kosakola, yango ekosalisa biso tóbatela mokolo ya Yehova na makanisi na biso. Ekobatela biso mpo mokili ya Satana ebebisa likebi na biso te mpe ekolendisa mokano oyo tozali na yango ya kobatela etamboli ya bosantu. (2 Pet. 3:​11-14) Na ntembe te, soki tobosani te ete mikolo etikali ya kotánga ntango tozali kokokisa mosala na biso ya kosakola, yango ekoki kobikisa biso moko mpe baoyo bazali koyoka biso.​—⁠1 Tim. 4:⁠16.