Okoki kosalisa bato mosusu?

¹ Yehova alukaka ntango nyonso mabaku ya kosalisa basaleli na ye ya sembo. (2 Nta. 16:9; Yis. 41:​10, 13) Ntango Yisaya akokanisaki Yehova na mobateli malamu ya bampate, akomaki boye: “Akoyanganisa bana na mpate na mabɔkɔ na ye; akokumba bango na ntolo na ye, akokamba malɛmbɛmalɛmbɛ baoyo bazali konungisa.” (Yis. 40:11) Tótalela mwa makambo oyo tokoki kosala mpo na komekola lolenge oyo Yehova atyelaka bato likebi.

² Tósalisa bato ya sika: Tokoki kosalisa bato ya sika soki tozali kobengisa bango mpo bálekisa ntango elongo na baninga ya malamu. (Mas. 13:20) Ndeko mobali moko azali lisusu kokanisa ndenge oyo bandeko mosusu basalisaki ye ntango abandaki koyangana na makita ya lisangá; alobi boye: “Ekómaki mbala mingi ete libota moko ebenga ngai nazala elongo na bango ntango bazali koyekola Biblia na libota. Ntango nakómaki kokola na kati ya solo, babalani mibale ya bilenge, oyo bazalaki babongisi-nzela, bazalaki kosɛnga ngai nasakolaka elongo na bango mokolo mobimba. Tozalaki ntango nyonso kosolola masolo ya elimo ya kolendisa mpenza.” Alobi lisusu boye: “Liboso nakóma moklisto, mbala mingi, nazalaki kokende kolekisa ntango elongo na baninga na mokolo ya mitano mpe ya pɔsɔ na butu. Kasi, lokola nakómaki kolekisa ntango elongo na bandeko, nazalaki lisusu te na mposa ya koluka baninga mosusu.” Ndenge bandeko ya lisangá batyelaki ndeko yango likebi na bolingo mpenza, esalisaki ye apika misisa mpe atɛlɛma ngwi na kati ya kondima, mpe lelo oyo azali kosala na Betele.​—⁠Kols. 2:​6, 7.

³ Tólendisanaka: Tokoki kozwa libaku ya kosalisa bandeko na biso ntango bazali na mikakatano. Okoki nde komibongisa mpo na kopesa litatoli na telefone elongo na mosakoli moko oyo azali ebɔsɔnɔ to kosɛnga ye akende elongo na yo mpo na koyekola Biblia na moto moko, to mbala mosusu okoki kokende koyekola na moto yango na ndako ya ndeko oyo azali ebɔsɔnɔ? Tata to mama oyo azali na bana mike azali nde na mposa básalisa ye ntango azali kosakola? Ezali na basakoli oyo bazalaka nsɔninsɔni, baoyo bakosepela osalisa bango ntango bazali kozongela bato oyo basepelaki to ntango bazali kosalela lolenge moko ya kosakola? Soki tolingaka bandeko na biso, tokoluka mabaku ya kolendisa bango.​—⁠Lom. 14:⁠19.

⁴ Soki tozali komekola ndenge oyo Yehova atyelaka basaleli na ye likebi na bolingo mpenza, tokolendisana mpe tokosala ete lisangá ezala na bomoko mpe na bolingo, mpe tokopesa Tata na biso ya likoló nkembo.​—⁠Ef. 4:16.