Salisá bana na yo bámesana na mosala ya kosakola

¹ Baboti baklisto bazali na mokumba monene ya kosalisa bana na bango bámesana na mosala ya kosakola kobanda na bomwana mpenza. Bakoki kosala yango na ndenge mingi. Bana mosusu bakangaka maloba ya vɛrsɛ na motó liboso kutu báyeba kotánga. Yango ekoki mpenza kobenda likebi ya bato oyo bazali koyoka bango. Ntango bana bazali kokola, bakoki kutu kosala lisusu mingi na mosala ya kosakola. Ndenge nini baboti bakoki kosalisa bana na bango mpo bápesaka litatoli? Ntango mosusu makanisi oyo elandi ekoki kosalisa bango.

² Nsima ya kopesa moto mbote, okoki koloba boye:

◼“Mwana na ngai ya mobali [nkombo na ye], alingi atánga vɛrsɛ moko ya ntina mingi, oyo akosepela oyoka yango.” Mwana na yo akoki koloba boye: “Vɛrsɛ oyo ezali na mokanda ya Nzembo eteyaki ngai nkombo ya Nzambe. [Mwana akotánga to akoloba makambo oyo ezali na Nzembo 83:18.] Bazulunalo oyo elobeli makambo oyo Yehova Nzambe akosala mpo na biso. Nakoki kotikela yo yango?” Okoki kosukisa lisolo na komonisa ndenge oyo makabo ya bolingo malamu esimbaka mosala na biso ya kosakola na mokili mobimba.

³ To okoki komeka makanisi oyo:

◼ “Mbote. Nazali kolakisa mwana na ngai ya mwasi [nkombo na ye], ndenge ya komibanzabanza mpo na basusu. Alingi koyebisa yo likambo moko ya mokuse oyo ezali na Biblia.” Mwana yango akoki koloba boye: “Lolenge moko oyo ngai nalingaka kosalisa basusu, ezali koyebisa bango elikya oyo ezali na Biblia mpo na mikolo ezali koya. [Mwana akotánga to akoloba makambo oyo ezali na Emoniseli 21:⁠4.] Zulunalo oyo ezali kolimbola makambo oyo Bokonzi ya Nzambe ekosala mpo na biso. Nakanisi ete okosepela kotánga yango.”

⁴ Mbala mingi, kosalela maloba ya kobanda lisolo ya pɛtɛɛ, esalisaka bana bábanga te ntango bazali koyebisa bato nsango ya Bokonzi. Komekameka lisolo mpo na koloba yango polele mpe na mwa mongongo makasi, ekosalisa bana básolola na bato ya ndenge nyonso. Soki bozali kobongisa masolo elongo na bana ya mike liboso mpenza mpe soki bozali kopesa bango longonya, bakolobela mpenza kondima na bango.

⁵ Bana mingi ya mike bakokisaki masɛngami mpo na kozala basakoli oyo bazwi naino batisimo te, mpo basalisaki bango ndenge wana. Ezali esengo mpenza komona ndenge bana na biso ya mike bazali komesana na mosala ya kosakola!​—⁠Nz. 148:​12, 13.