Salisá basusu bákóma baninga ya Nzambe
1 Lelo oyo, Yehova azali koteya bato ya bikólo nyonso banzela na ye. (Yis. 2:2, 3) Nzokande, mpo bato yango “[bábota] mbuma elongo na koyika mpiko,” basengeli liboso kolinga Yehova. (Luka 8:15; Mko. 12:30) Soki balingi Yehova te, bakozala na makasi te ya kolonga masɛnginya mpe bakozala na mpiko te ya kosala oyo ezali malamu. Lolenge moko ya kosalisa basusu bákóma baninga ya Yehova ezali ya kosalisa bango básepela na bizaleli na ye. Lendisá bango bákanisa na mozindo makambo oyo ezali na buku Pusaná penepene na Yehova.
2 Ndakisa na yo: Misala na yo ekoki kosimba mpenza mitema ya bato oyo oyekolaka na bango Biblia. Ntango bazali komona yo ozali kozwa boyokani na yo na Yehova na motuya mingi mpe komona ndenge yango ebongoli bomoi na yo, yango ekoki kotinda bango báluka mpe kokóma baninga ya Yehova. (Luka 6:40) Kutu mbala mingi, ndakisa na biso eteyaka basusu koleka makambo oyo tolobaka.
3 Lolenge ya liboso mpenza oyo baboti bateyaka bana na bango bálinga Yehova ezali na nzela ya ndakisa na bango. (Det. 6:4-9) Mobali moko ná mwasi na ye oyo bazalaki na mposa ya kobɔkɔla bana na bango na kati ya solo, bakendaki koluka toli epai ya baboti oyo babɔkɔlá bana na bango malamu. Mobali alobi boye: “Baoyo nyonso nasololaki na bango balobaki ete baboti basengeli kozala ndakisa malamu.” Na bongo, na makambo nyonso ya bomoi na bango, baboti bakoki kopesa bana na bango ndakisa malamu na likambo ya kozala “moninga ya Nzambe.”—Yak. 2:23.
4 Mabondeli oyo euti mpenza na motema: Okoki mpe kosalisa basusu bákoma baninga ya Yehova soki ozali koteya bango básalaka mabondeli oyo euti mpenza na motema. Okoki komonisa bango libondeli oyo Yesu apesaki lokola ndakisa, mpe mabondeli mosusu oyo eutaki mpenza na motema, oyo ezali na Makomami. (Mat. 6:9, 10) Okoki koteya bana na yo mpe bato oyo oyekolaka na bango Biblia ndenge ya kobondela ntango bazali koyoka yo ozali kobondela. Soki bazali koyoka yo ozali kobimisa maloba ya botɔndi oyo euti mpenza na motema, bakomona ete olingaka mpenza Yehova. Ntango bakutani na mimekano, lendisá bango “[ bátingama] na mabondeli.” (Lom. 12:12) Ntango bakomona ete Yehova azali kosalisa bango na ntango bazali mpenza na mposa na ye, bakobanda kotyela ye motema mpe bakolinga ye lokola moninga na bango mpenza.—Nz. 34:8; Filp. 4:6, 7.