Moto oyo amipesaka na bolingo na ye moko azwaka mapamboli
1. Ndenge nini Davidi mpe Nehemia bamipesaki na bolingo na bango moko?
1 Ntango Goliata atumolaki basoda ya Yisalaele, soda moko te andimaki kobunda na ye. Kasi, elenge mobali moko mobateli ya bampate, oyo kutu ayekolaki makambo ya bitumba te, amipesaki na bolingo na ye moko mpo na kobunda na ye. (1 Sam. 17:32) Ntango Bayuda oyo babimaki na boombo bazongaki na Yelusaleme, balongaki te kotonga lisusu bifelo na yango; kasi, ezali moto moko oyo azalaki kosala na mesa ya Mokonzi ya Perse nde andimaki kotika esika na ye ya lokumu mpe kosala mobembo tii na Yelusaleme mpo na kotambwisa mosala yango. (Neh. 2:5) Yehova apambolaki bato yango mibale, elingi koloba Davidi mpe Nehemia, na ndenge bamipesaki na bolingo na bango moko.—1 Sam. 17:45, 50; Neh. 6:15, 16.
2. Mpo na nini baklisto basengeli komipesaka na bolingo na bango moko?
2 Lelo oyo, bato mingi bandimaka te komipesa mpo na kosalela basusu. Na mikolo oyo ya nsuka, bato bazali na makambo mingi ya kosala, mpe mingi bazali “bato oyo bamilingaka bango moko.” (2 Tim. 3:1, 2) Ezali mpasi te mpo moto amipesa mingi na makambo na ye moko mpe aboya kosalisa bato mosusu oyo bazali na mposa ya lisalisi. Nzokande, lokola tozali baklisto, mposa na biso ezali ete tólanda ndakisa ya Yesu, na ndenge azalaki koluka mabaku ya kosalisa basusu. (Yoa. 5:5-9; 13:12-15; 1 Pet. 2:21) Ndenge nini tokoki komonisa ete tolingi kosalela basusu na bolingo na biso moko, mpe yango ekopesa biso matomba nini?
3. Na ndenge nini komipesa na bolingo na biso moko esalaka ete makita eleka malamu?
3 Mpo na bolamu ya bandeko: Tokoki kopesa basusu “likabo ya elimo” soki tozali kopesa biyano na makita na bolingo na biso moko, na masolo oyo esɛngaka ete bayangani báloba. (Lom. 1:11) Ntango topesaka biyano na makita, yango ekumisaka Yehova, esalaka ete mateya ya solo efanda mpenza na makanisi mpe na mitema na biso, mpe esalisaka biso tósepela na makita lisusu mingi. (Nz. 26:12) Lisusu, tokoki mpe komipesa na bolingo na biso moko mpo na kosala lisolo moko na Eteyelo ya mosala ya Teokrasi soki ndeko oyo asengelaki kosala yango azali te. Yango ekosalisa biso tókolisa mayele na biso ya koteya.
4. Na makambo nini mosusu tokoki komonisa ete tomipesi na bolingo na biso moko?
4 Bandeko mibali bakomonisa ete bazali komipesa na bolingo na bango moko, soki bazali koluka kozwa mikumba na lisangá. (Yis. 32:2; 1 Tim. 3:1) Biso nyonso tokoki kosala ete mayangani elekaka malamu soki tomipesi na bolingo na biso moko mpo na kosala na badepartema ndenge na ndenge ya liyangani. Ntango tomipesaka na bolingo na biso moko mpo na kosakola elongo na mokɛngɛli ya zongazonga to kopesa ye bilei, yango esalaka ete “kolendisana ezala na kati na [biso].” (Lom. 1:12) Ntango tosalisaka mpenza bitike, basi oyo bakufelá mibali, bandeko oyo bazali na maladi to bibɔsɔnɔ, bamama oyo bazali na bana ya mike, mpe bandeko mosusu ya lisangá, yango epesaka biso esengo mpenza mpe Yehova andimaka biso.—Mas. 19:17; Mis. 20:35.
5. Makambo nini etali Ndako ya Bokonzi oyo ezali kosɛnga tómipesa na bolingo na biso moko?
5 Ndenge mosusu ya kopesa ntango mpe makasi na biso, na bolingo na biso moko mpo na kosalela basusu, ezali ya kotya bopɛto na Ndako ya Bokonzi mpe kobatela yango. Lisusu, lokola bato mingi bazali kondima mateya ya solo, mposa ya Bandako ya Bokonzi ya sika mpe bandeko oyo bakopesa mabɔkɔ mpo na kotonga yango ezali se kobakisama. Mobali moko ná mwasi na ye basepelaki kopesa mabɔkɔ na Komite ya botongi ya mboka na bango, atako bayebaki misala ya kotonga te. Mokemoke, balakisaki bango misala yango mpe sikoyo bazali kopesa mabɔkɔ na mosala ya masɔ. Mwasi alobi boye: “Kosala na bomoko elongo na bandeko esalisi biso tókóma baninga mpenza. Na nsuka ya mokolo, tolɛmbaka mingi, kasi tolendisanaka na elimo.”
6. Mpo na nini mosala ya kosakola ezali na ntina mingi koleka misala nyonso oyo bato bamipesaka na bolingo na bango moko?
6 Na nzela ya kosakola: Lelo oyo, kosakola nsango ya Bokonzi ezali mosala oyo eleki ntina kati na misala nyonso moto akoki komipesa na bolingo na ye moko. Ntango tosalisaka bato báyeba Biblia mpe básalela toli na yango, bakómaka komona ete bomoi ezali na ntina mpe batikaka mimeseno ya mabe. Bayekolaka elikya ya kolendisa oyo Biblia epesi mpo na mikolo ezali koya. Ntango tozali koteya bato Biblia, tozali komipesa na bolingo mpenza na mosala ya esengo oyo epesaka bato mosusu matomba ya seko. (Yoa. 17:3; 1 Tim. 4:16) Mbala mosusu, bomoi na biso ekoki kopesa biso nzela ya komipesa mingi na mosala yango, kokóma mobongisi-nzela mosungi to mobongisi-nzela ya sanza na sanza, to kokende epai mposa ezali makasi, to koyekola monɔkɔ mosusu.
7. Mpo na nini ezali na ntina mingi tómipesa na bolingo na biso moko lelo oyo?
7 Mokonzi Davidi asakolaki ete ntango Masiya akobanda koyangela, basaleli ya Nzambe “bakomipesa na ye na bolingo nyonso.” (Nz. 110:3) Lokola Yehova azali kotambwisa nokinoki mosala ya kobuka mbuma na elimo na ntango oyo ya nsuka, mosala ezali mingi mpe ezali kosɛnga bato oyo bamipesi na bolingo na bango moko mpo na kosala yango. (Yis. 60:22) Osili koloba ete: “Ngai oyo! Tindá ngai”? (Yis. 6:8) Ya solo, ntango tozali komipesa na bolingo na biso moko, tozali kosepelisa Yehova mpe kozwa mapamboli mingi.