Landá ndakisa ya Klisto na mosala na yo ya kosakola

¹ Yesu atikelá biso ndakisa oyo tosengeli kolanda na mosala ya kosakola. Na mabaku mingi mpe na makambo ndenge na ndenge, amonisaki polele ete alingaka Nzambe mingi mpenza ná bato. Ateyaki bato ya komikitisa mateya ya solo, mpe asalelaki baoyo bazali konyokwama misala ya motema-boboto.​—Mat. 9:35.

² Ndakisa ya Yesu mpe mateya na ye: Yesu amikɔtisaki te na makambo ya politiki to na misala ya kosalisa bato mpo na kobongisa bomoi na bango. Atikaki mpe te ete makambo mosusu, ata ya malamu, ebulunganisa makanisi na ye to ezwa esika ya mosala mpenza oyo ye ayelaki. (Luka 8:1) Amipesaki mingi na kosakola nsango malamu ya Bokonzi ya Nzambe, mpe amonisaki ete yango nde ekosilisa mikakatano ya bato mpo na libela. Yesu azalaki na mosala monene mpe ntango ya kosala yango ezalaki moke. Ntango bato ya Kapalanauma balobaki na ye atikala epai na bango, ayebisaki bayekoli na ye ete: “Tiká tókende epai mosusu . . . mpo nasakola mpe kuna, mpamba te ezali mpo na yango nde nabimaki.”​—Mko. 1:38.

³ Nsima ya kopesa bayekoli na ye formasyo, Yesu atindaki bango na mosala ya kosakola mpe apesaki bango malako ya sikisiki oyo: “Bósakola, kolobáká ete, ‘Bokonzi ya likoló ekómi pene.’ ” (Mat. 10:7) Ateyaki bayekoli na ye ete basengeli kotya Bokonzi ya Nzambe na esika ya liboso na bomoi na bango. (Mat. 6:33) Maloba ya nsuka oyo Yesu alobaki na bayekoli liboso amata na likoló emonisaki polele oyo basengelaki kosala. Ayebisaki bango ete: “Na yango bókende mpe bókómisa bato bayekoli na bikólo nyonso.”​—Mat. 28:19.

⁴ Ntina ya Bokonzi ya Nzambe: Motó ya likambo ya kosakola ya Yesu ezalaki Bokonzi ya Nzambe, mpe alendisaki bayekoli na ye bálanda ndakisa na ye. Milende oyo bato bazali kosala mpo na kosilisa bampasi ekolonga te. (Yil. 10:23) Bobele Bokonzi ya Nzambe nde ekosantisa nkombo ya Nzambe mpe ekosilisa bampasi mpo na libela. (Mat. 6:9, 10) Koteya bato oyo bazali ‘kokimela mpe kolela na ntina na makambo ya mbindo nyonso oyo ezali kosalema’ ekosalisa bango bázala na bomoi ya malamu mpe ya esengo sikoyo, mpe bázala na elikya ya solosolo.​—Ezek. 9:4.

⁵ Tii lelo oyo, Yesu azali kopesa mabɔkɔ na mosala ya kosakola nsango malamu ya Bokonzi ya Nzambe, mpe alakaki ete akotika te kosalisa biso. (Mat. 28:20) Na mosala na biso ya kosakola, na lolenge nini tozali mpenza kolanda ndakisa oyo Yesu atikelá biso? (1 Pet. 2:21) Na mikolo ya nsuka oyo tozali, tiká tósala nyonso oyo tokoki mpo na kolanda malamumalamu ndakisa ya Yesu na mosala na biso ya kosakola!