Mosala ya kosakola ezali mosala ya libosoliboso ya baklisto

¹ Biso nyonso tozali na misala ndenge na ndenge oyo tosengeli kosala. Kokokisa bamposa ya libota na biso ezali lisɛngami ya Nzambe. (1 Tim. 5:8) Kasi, mosala oyo tozali kosala mpo na kokokisa lisɛngami wana ya Nzambe, esengeli te kozwa esika ya mosala ya kosakola mpe ya kozalisa bayekoli.​—Mat. 24:14; 28:19-20.

² Yesu apesaki biso ndakisa malamu mpo na oyo etali “koluka liboso bokonzi.” (Mat. 6:33; 1 pet. 2:21) Atako azalaki na biloko mingi te ya mosuni, Yesu amipesaki mobimba mpenza mpo na kosala mokano ya Tata na ye. (Luka 4:43; 9:58; Yoa. 4:34) Azalaki na molende mpenza mpo na kopesa litatoli na mabaku nyonso. (Luka 23:43; 1 Tim. 6:13) Alendisaki mpe bayekoli na ye ete bázala na molende lokola ye na mosala ya kobuka mbuma.​—Mat. 9:37, 38.

³ Ndenge oyo tokoki komekola Yesu lelo: Tokoki kolanda ndakisa ya Yesu soki tosali makasi ya kozala na bomoi ezangi mindɔndɔ, oyo ezali kopesa nzela ya kosala mingi na mosala ya kosakola. Soki tozali na oyo esengeli mpo na kobikela, tólanda toli ya Biblia ya koboya koluka kozwa biloko mingi ya mokili oyo. (Mat. 6:19, 20; 1 tim. 6:8) Eleki malamu mpenza koluka komipesa lisusu mingi koleka na mosala ya kosakola! Ata ntango tokutani na mikakatano, tokoki kosala milende lokola Yesu, tosengeli kotika nzela te ete mitungisi ya bomoi epekisa biso na kokokisa mosala na biso ya libosoliboso oyo ezali kosakola nsango ya Bokonzi.​—Luka 8:14; 9:59-62.

⁴ Ata baoyo bazalaka na mikumba mingi, batyaka mosala ya kosakola na esika ya liboso. Ndeko mobali moko oyo azali na libota ya monene, mokonzi monene ya kompanyi, mpe nkulutu na lisangá, alobi boye: “Natalelaka mosala ya kosakola lokola mosala ya liboso ya bomoi na ngai.” Ndeko mwasi moko oyo azali mobongisi-nzela alobaki boye: “kosala mosala ya mobongisi-nzela epesaka esengo koleka misala nyonso mosusu.”

⁵ Ata soki tozali na bomoi ya ndenge nini, tiká tólanda ndakisa ya Yesu. Ndenge nini? Na kokómisáká mosala ya kosakola mosala na biso ya libosoliboso.