Kampanye monene ya kosakola oyo esalemá naino liboso te!
Ekoki sikoyo mbula koleka 100 banda Batatoli ya Yehova babongisamaki mpo na kosakola nsango malamu. (1 Kol. 9:23) Yango nde ekómi kampanye monene ya kosakola oyo esalemá naino liboso te. Tozali kosakola na minɔkɔ koleka nkama moko mpe na mikili koleka 230. (Mat. 24:14) Kasi, mpo na nini mosala yango ezali na ntina? Mpe ndenge nini ezali kosalema na mokili mobimba?
Video oyo ezali na motó ya likambo Les Témoins de Jéhovah : organisés pour prêcher la bonne nouvelle (Batatoli ya Yehova babongisami mpo na kosakola nsango malamu) epesi biyano na mituna yango mpe emonisi polele makambo ndenge na ndenge etali mosala na biso na mokili mobimba. Ntango ozali kotala yango, talelá mituna oyo: (1) Ndenge nini mosala na biso ebongisami mpe etambwisami? (2) Ndenge nini Departema ya Bokomi, ya Kobongola mikanda, ya Mayemi, mpe ya Kasɛti mpe Video, ezali kopesa nzela ete nsango malamu esakolama? (3) Mpo na nini bayeisi monene bisika ya konyata mpe ya kokabola mikanda mpo na kotinda yango bipai na bipai? (Yoa. 17:3) (4) Bamasini yango enyataka mikanda boni na mbula? (5) Mikanda na biso oyo elimbolaka Biblia ebimisi matomba nini? (Ebe. 4:12) (6) Nini ezali kosalema mpo na kosalisa na elimo bato oyo bakufá miso mpe oyo bakufá matoi? (7) Epai wapi tozwaka bongo mpo na kokokisa mosala na biso? (8) Matomba nini tozwaka na Biro ya makambo etali boyokani elongo na minganga, Biro oyo etalelaka mosala ya kosakola, mpe Departema ya Mayangani? (9) Lokola ozali Motatoli ya Yehova, ndenge nini video yango esalisi yo osepela lisusu mingi na (a) milende oyo ebongiseli ya Yehova ezali kosala mpo na kosakolama ya nsango malamu? (b) mabota ya Betele koleka 100 na mokili mobimba? (c) biteyelo oyo ebongisami mpo na bakɛngɛli mpe bamisionɛrɛ? (d) kotánga mokapo ya mokolo ntɔngɔ nyonso mpe kobongisa makita nyonso? (e) matomba oyo tozwaka na makita na biso? (f) makambo malamu oyo ekozala na paladiso awa na mabelé? (Yis. 11:9) (g) kopesa mabɔkɔ na mosala ya kobuka mbuma oyo ezali kokoba kosalema?—Yoa. 4:35.
Makambo nini ya malamu oyo bato balobaki mpo na video yango, ntango olakisaki yango na bandeko mpe baninga na yo, bato oyo ozongelaka, mpe baoyo oyekolaka na bango Biblia? Mpo na nini te kolakisa basusu video yango? Kozela te mpo na koyebisa bato nsango malamu.—Mat. 28:19, 20.