Ezali na ntina komibongisa mpo na kozongela bato na ndenge oyo ekobota mbuma
1. Na ndenge nini mosala ya kosakola ya baklisto ya ekeke ya liboso esengelaki kosalema na bisika mingi?
1 Yesu abongisaki bayekoli na ye malamu mpo bákóma basakoli ya “nsango malamu ya bokonzi,” oyo babotaka mbuma. (Mat. 4:23; 9:35) Ntango Yesu azalaki kobongisa bango, azalaki kosakola kaka na Palestine. Nzokande, liboso Yesu amata na likoló, amonisaki ete mosala ya kosakola ya baklisto ekosalema na bisika mingi mpe ‘bakokómisa bato bayekoli na bikólo nyonso.’—Mat. 28:19, 20.
2. Kotosa etinda ya Yesu ya ‘kokómisa bato bayekoli’ ezali kosɛnga tósala nini?
2 Mosala yango elingaki kosɛnga kozongela bato oyo basepelaki na nsango malamu ya Bokonzi ya Nzambe mpe koteya bango bátosa makambo nyonso oyo Klisto apesaki etinda. Mpo tózongela bato na ndenge oyo ekobota mbuma, tosengeli komibongisaka malamu.
3. Ata ntango okutani na moto mpo na mbala ya liboso, ndenge nini okoki kozwa nzela ya kozongela ye?
3 Bongisá nzela: Ntango bakutani na moto mpo na mbala ya liboso, basakoli mosusu basalaka makasi bátuna ye motuna moko na nsuka ya lisolo mpe bapesaka ye elaka ete bakozongela ye mpo na koyanola na motuna yango. Bamonaka mpe ete kolobela makambo oyo ezali na buku Biblia eteyaka ntango bazongeli moto, epesaka bango nzela ya kobanda mbala moko koyekola na ye Biblia.
4. Mpo na nini tosengeli te kozela tózwa naino bazulunalo ya sika liboso ya kozongela moto?
4 Atako tokómi kaka na bazulunalo mibale ya kopesa bato na sanza moko, yango elingi koloba te ete tosengeli kozela tózwa naino bazulunalo ya sika liboso ya kozongela bato oyo totikelaki bazulunalo. Kosolola na moto makambo oyo ezali na zulunalo oyo azwaki ekoki kosalisa ye asepela lisusu mingi na nsango malamu.
5. Komityela mokano ezali na ntina nini?
5 Zalá na mokano: Liboso ya kozongela moto, zwá mwa miniti mpo na kotalela mwa makambo oyo okomaki nsima ya kosolola na ye mpe luká koyeba mokano oyo okokokisa ntango okozongela ye. Na ndakisa, okoki komityela mokano ya kotalela elongo na ye makambo oyo ezali na mokanda oyo otikelaki ye, to kotikela ye mokanda mosusu oyo ezali na boyokani na lisolo oyo bosololaki mbala eleki. Soki otikaki motuna moko mbala eleki, ntembe ezali te ete mokano na yo ekozala mpe ya koyanola na motuna yango. Ntango ozali kobenda likebi na ye na vɛrsɛ moko oyo esimbi likanisi oyo ozali kolobela, salá makasi otánga vɛrsɛ yango na kati ya Biblia.
6. Mokano nini tozalaka na yango ntango tozali kozongela bato?
6 Mokano na biso ya libosoliboso: Mokano na biso ezali ya kobanda koyekola na bato Biblia. Ndeko mobali moko azongelaki moto moko mpe asɛngaki ye bábanda koyekola Biblia, kasi moto yango aboyaki. Ndeko yango azongaki lisusu kotikela ye bazulunalo oyo eutaki kobima mpe alobaki na ye boye: “Lelo, tozali kopesa bato eyano na motuna moko ya Biblia oyo bamitunaka.” Nsima ya koyoka likanisi na ye, ndeko yango atángelaki ye vɛrsɛ moko mpe paragrafe moko oyo elobeli likambo yango na mokanda moko oyo tozalaki kosalela mpo na koyekola Biblia na bato. Na nsima, bakobaki koyekola Biblia.
7. Ndenge nini komibongisa malamu esalisaki yo obanda koyekola na moto Biblia?
7 Soki tozali kozwa ntango ya komibongisa liboso ya kozongela bato, milende na biso ekokende mpamba te. Tokokóma na esengo mingi mpe tokoki kozwa libaku malamu ya kosalisa moto oyo azali na “ezaleli oyo ebongi” atambola na nzela ya bomoi.—Mis. 13:48.