Ezali na ntina mingi tóyekolaka Biblia biso moko mpe na libota!

1. Ndenge nini Lisangani ya Mikóló-Bakambi bazali komibanzabanza mpenza mpo na biso lelo oyo, mpe mpo na nini?

¹ Ndenge moko na ekeke ya liboso, lelo oyo mpe Lisangani ya Mikóló-Bakambi bazali komibanzabanza mpo na bolamu ya basaleli ya Yehova. (Mis. 15:​6, 28) Lokola bolɔzi monene ezali se kokóma pene, ezali na ntina mingi ete mosakoli mokomoko ya Bokonzi azala na boyokani makasi na Yehova. Ndenge nini tokosalela ntango oyo tozalaki kolekisa na Boyekoli ya mokanda ya lisangá? Biso nyonso tolendisami ete tósalela ntango yango mpo na koyekola na libota. Soki tosaleli ntango yango malamu, tokozwa likoki ya koyekola Liloba ya Nzambe na mozindo mpe tokozwa matomba na mai na yango oyo epesaka bomoi.​—⁠Nz. 1:​1-3; Lom. 11:​33, 34.

2. Ndenge nini tokoki kosala mpo na koyekola na libota na mpokwa?

² Koyekola na libota na mpokwa: Tolendisi batata bákokisa mokumba oyo Yehova apesi bango ya koyekola Biblia na mozindo mpe mbala na mbala elongo na mabota na bango. (Det. 6:​6, 7) Bandeko basi mpe mibali oyo bazali minzemba, oyo bazali na mikumba ya libota te, bakoki kosalela ntango yango mpo na koyekola Biblia bango moko mpe kosala bolukiluki. Ezali na ntina mingi ete biso nyonso ‘tómisombelaka ntango oyo ebongi’ mpo na koyekola mpe komanyola mpo tótikala makasi na elimo atako tozali kobika na ‘mikolo mabe.’​—⁠Ef. 5:​15, 16.

3, 4. Makanisi nini bapesi biso na oyo etali makambo ya koyekola, mpe mokano na biso esengeli kozala nini ntango tozali koyekola?

³ Makambo ya koyekola: Index des publications Watch Tower to diskɛ CD-ROM Watchtower Library ekoki kosalisa bino bózwa makambo oyo ekokómisa boyekoli na bino lisusu kitoko. Mabota bakoki kotalela masolo oyo ebimaka mbala na mbala na Linɔ́ngi ya Mosɛnzɛli na ndakisa “Sɛkɛlɛ mpo na libota ya esengo,” “Teyá bana na yo,” mpe “Mpo na bilenge.” Lisusu, Lamuká! ezali na masolo “Mituna oyo bilenge batunaka” mpe masolo mosusu ya kitoko ya bozalisi.

⁴ Kotánga Biblia na mongongo makasi kasi malɛmbɛmalɛmbɛ ekosalisa libota bákɔtisa mitinda ya Nzambe mpe mateya na ye na makanisi mpe mitema na bango. (Ebe. 4:12) Mikolo mosusu, bokoki kotala video moko ya moombo ya sembo mpe kolobela yango elongo. Soki bokanisi malamu, bokozanga te makambo ya koyekola mpe bokoyeba ndenge ya koyekola yango. Mpo na nini te kotuna bato ya libota na yo makambo nini ekosepelisa bango?

5. Mpo na nini koyekola Biblia biso moko mpe na libota ezali na ntina mingi lelo oyo?

⁵ Mpo na nini ezali na ntina mingi lelo oyo?: Soki tokómi na boyokani makasi na Yehova, tokomibongisa mpo na ‘kotɛlɛma ngwi mpe kotala kobikisa ya Yehova.’ (Ex. 14:13) Baboti bazali na mposa ya litambwisi ya Nzambe mpo na kobɔkɔla bana malamu “na kati ya libota oyo etɛngamá mpe egumbamá.” (Filp. 2:15) Bana bazali na mposa ya lisalisi mpo na kokima bizaleli mabe oyo ekómi komonana mingi na biteyelo. (Mas. 22:​3, 6) Babalani basengeli kozala na boyokani malamu na Yehova mpo ‘nkamba na bango ya nsinga misato’ ezala ntango nyonso makasi. (Mos. 4:12) Tiká ete tósalela malamu ntango oyo etikali mpo na komitonga likoló ya ‘kondima na biso ya bosantu koleka’!​—⁠Yuda 20.