Mosala oyo tosengeli kotya na esika ya liboso
1. Ndenge nini Yesu amonisaki ete mosala ya kosakola ezalaki na ntina mingi na bomoi na ye?
1 Mosala ya kosakola ezalaki na esika ya liboso na bomoi ya Yesu. Amipesaki mingi na mosala yango, azalaki kotambola bankama ya bakilomɛtrɛ na Palestine mobimba mpo na kosakwela bato ebele. Aponaki kozala na bomoi ya pɛpɛlɛ mpo amipesa mobimba mpe alekisa ntango mingi na mosala ya kosakola. (Mat. 8:20) Ntango bato bazalaki kozwa ye ntango mingi mpo abikisa maladi na bango, alobaki: “Nasengeli mpe kosakola nsango malamu ya bokonzi ya Nzambe na bingumba mosusu, mpamba te natindamaki mpo na yango.”—Luka 4:43.
2. Mpo na nini mosala ya kosakola ezalaki na ntina mingi mpo na Yesu?
2 Mpo na nini mosala ya kosakola ezalaki na ntina mingi mpo na Yesu? Likambo ya libosoliboso mpo na ye ezalaki kosantisa nkombo ya Yehova. (Mat. 6:9) Azalaki kolinga Tata na ye ya likoló mingi, yango wana azalaki na mposa makasi ya kokokisa mokano na ye mpe kotosa mibeko na ye nyonso. (Yoa. 14:31) Longola yango, azalaki komibanzabanza mpo na bato mpe azalaki kosalisa bango.—Mat. 9:36, 37.
3. Ndenge nini tokoki komonisa ete totyaka mosala ya kosakola na esika ya liboso?
3 Tólanda ndakisa ya Yesu: Kotya mosala ya kosakola na esika ya liboso na bomoi na biso na ndakisa ya Yesu ezali pɛtɛɛ te mpo mokili etondi na makambo oyo ezali kolya biso ntango mingi mpe kolongola likebi na biso na makambo ya ntina. (Mat. 24:37-39; Luka 21:34) Yango wana, tosengeli kolukaka koyeba makambo oyo eleki ntina mpe kosala programɛ ya kobimaka na mosala ya kosakola mbala na mbala. (Flp. 1:10) Tosengeli kosala makasi tózala na bomoi oyo ezangi mindɔndɔ mpe tóboya kosalela mokili na makambo nyonso.—1 Ko. 7:31.
4. Mpo na nini ezali na ntina tótyaka makambo eleki ntina na esika ya liboso?
4 Soki ntango ekómi mokuse, moto ya mayele asalaka makambo oyo eleki ntina na esika ya liboso. Na ndakisa, soki ayoki ete likama moko ezali koya, akosalela ntango mpe makasi na ye nyonso mpo na koluka ndenge ya kobatela libota na ye mpe kokebisa bazalani na ye. Akosundola makambo oyo ezali na ntina mingi te. Ntango oyo etikali liboso ete likama monene ya Armagedone ekóma ezali mokuse. (Sef. 1:14-16; 1 Ko. 7:29) Mpo tómibikisa mpe tóbikisa bato oyo bazali koyoka biso, tosengeli ntango nyonso komibatela mpe kokeba na mateya na biso, ezala na kati to libándá ya lisangá. (1 Tim. 4:16) Ya solo, mpo tóbika, tosengeli kotya mosala ya kosakola na esika ya liboso!