Soki osengeli na mikanda nokinoki na monɔkɔ mosusu

Ntango mosusu, tokutanaka na bato oyo balingaka kotánga mikanda na biso na monɔkɔ mosusu, kasi tozali na mikanda ya monɔkɔ yango te na lisangá na biso. Oyebi ete soki ozali na likoki ya kosalela Internet mpe mwa masini oyo ebimisaka mikanda na papye (imprimante), yo moko okoki kobimisa mikanda na minɔkɔ soki 400? Okosala boye:

• Kɔtá na adrɛsi www.watchtower.org, site Internet na biso.

• Na lobɔkɔ ya mobali ya lokasa oyo ebimaka liboso, okomona liste ya mwa minɔkɔ. Finá fɔtɔ ya globe oyo ezali na nsuka ya liste yango mpo na komona minɔkɔ nyonso oyo mikanda ya moombo ya sembo ebimá.

• Poná monɔkɔ oyo ozali koluka. Lokasa moko ekobima, oyo ekomonisa mikanda oyo okoki kobimisa na papye, na ndakisa batrakte, mwa babuku, mpe masolo mosusu. Lokola lokasa yango ekomami na monɔkɔ oyo oponaki, komitungisa te soki ozali koyeba batitre yango te.

• Poná titre nyonso olingi. Lisolo mobimba ekobima na ordinatɛrɛ mpe mpo na kobimisa yango na papye, salelá elembo ya imprimante.

Site Internet na biso ezali kaka na mwa ndambo ya mikanda; mpo na kozwa mikanda mosusu, esengeli kosɛnga yango na nzela ya lisangá. Soki emonani ete moto azali kosepela, eleki malamu kosɛnga mikanda na nzela ya lisangá.