Okolinga kobongola makambo mosusu?
1. Lokola makambo ya mokili ezali se kobongwana, yango ezali kosɛnga ete tóbongola makambo nini?
1 Na 1 Bakorinti 7:31, Biblia ekokanisi mokili oyo na esika ya teyatre: baoyo basilisi kosana bakei mpe bamosusu bakɔti. Lokola makambo ya mokili ezali kobongwana, yango ezali mpe kosɛnga ete tóbongolaka mbala na mbala lolenge na biso ya kosakola, manaka na biso mpe ndenge na biso ya kosolola na bato. Okolinga kobongola makambo mosusu?
2. Mpo na nini tosengeli kobongolaka makambo mosusu mpo tókende elongo na ebongiseli ya Yehova?
2 Ndenge na yo ya kosakola: Banda kala, lisangá ya bokristo ezalaka pene ya kobongola makambo mosusu. Na ebandeli, ntango Yesu atindaki bayekoli na ye, ayebisaki bango ete bámema te saki ya bilei to mbongo. (Mat. 10:9, 10) Kasi na nsima, abongolaki malako yango na kotalela makambo ya mpasi oyo bayekoli basengelaki kokutana na yango mpe bokoli ya mosala ya kosakola na bateritware mosusu. (Luka 22:36) Na mbula nkama oyo eleki, ebongiseli ya Yehova esalelaki mayele ndenge na ndenge ya kosakola. Na ndakisa, kopesa litatoli na nzela ya bakarte ya kopesa litatoli, baradio, mpe mituka oyo ezalaki na bikoliseli-lolaka na kotalela bosɛnga ya eleko wana. Lelo oyo, lokola na bisika mingi ezalaka mpasi kokuta bato na ndako, longola kosakola ndako na ndako, tolendisamaki mpe na kopesa litatoli na bisika ya bato nyonso mpe na libaku malamu. Tolendisamaki mpe na kokende ndako na ndako na ebandeli ya mpokwa, soki bato bakendeke mosala na moi. Lokola likalo ya Yehova ya likoló ezali se kobongola nzela ya kokende, yo mpe ozali kokende elongo na yango?—Ezk. 1:20, 21.
3. Ndenge nini koyokanisa lisolo na mposa ya moto esalisaka biso tópesa litatoli malamu na teritware na biso?
3 Ndenge na yo ya kobanda lisolo: Makambo nini ezali kotungisa bato sikoyo epai na bino? Nkita? Libota? Etumba? Ezali na ntina tóyeba makambo oyo ezali kotungisa bato ya teritware na biso mpo tóbongisa lisolo na ndenge oyo ekoyokana na bamposa na bango. (1 Ko. 9:20-23) Ntango moto oyo tozali kosolola na ye amonisi makanisi na ye, na esika ya kopesa ye kaka eyano mpe kokoba na lisolo oyo tobongisaki, ekozala malamu tóyokanisa lisolo na mposa ya moto yango.
4. Mpo na nini tosengeli kokakatana te kobongola makambo mosusu?
4 Mosika te, “makambo” ya mokili oyo ekosuka mpe bolɔzi monene ekobanda. “Ntango oyo etikali ekómi mokuse.” (1 Ko. 7:29) Na yango, ezali na ntina tóbongola makambo mosusu kozanga koumela, mpo tókoka kosala mingi mpenza na mwa ntango moke oyo etikali!