Lolenge malamu ya kosalela bazulunalo ya kala

Lokola bazulunalo ya kala ekoki kosalisa moto te soki tobombi yango na ndako to tobwaki yango, tosengeli koluka ndenge ya kokabola yango. Zulunalo moko mpamba ekoki kopesa moto mposa ya koyeba solo mpe kotinda ye abanda kobelela nkombo ya Yehova. (Rom. 10:13, 14) Mwa makanisi oyo elandi ekosalisa biso tóyeba lolenge malamu ya kosalela bazulunalo ya kala.

• Ntango bozali kosakola na bateritware oyo bosakolaka mingi te, mbala mosusu bokoki kotya yango na nse ya porte ya bandako oyo bokuti bato te.

• Ntango ozali kosakola na bisika ya bato nyonso, na ndakisa na balabala, na bisika oyo bato bazelaka bisi to engbunduka, tuná moto soki akosepela kozwa mokanda ya kotánga, lakisá ye bazulunalo ya kala ebele, mpe sɛngá ye apona.

• Ntango okei na bisika lokola bandako oyo basukolaka bilamba, bandako ya mibange, balopitalo, to bisika mosusu ya ndenge wana oyo ezali na teritware ya lisangá na bino, okoki kotika bazulunalo ya kala na bisika oyo bato bafandaka mpo na kozela. Mbala mingi, liboso ya kosala bongo, ezalaka malamu kozwa ndingisa epai ya mokambi ya esika yango, soki azali wana. Soki okuti bazulunalo mosusu wana, kobakisa mosusu te.

• Ntango ozali komibongisa mpo na kozongela bato, kanisá makambo nini ekoki kosepelisa moto mokomoko. Azali tata ya libota to mama ya libota? Asepelaka kosala mibembo? Asepelaka na mosala ya kolona mpe kobongisa bafololo? Talá na bazunalo ya kala soki ezali na lisolo oyo akoki kosepela kotánga mpe lakisá ye yango ntango ozongeli ye.

• Ntango okuti moto oyo asepelaki na nsango malamu, nsima ya koluka ye mbala na mbala na ndako, lakisá ye bazulunalo ya kala oyo azwaki te.