Tókolisa makoki na biso ya kosakola—Ndenge ya kobongisa nzela mpo na kozongela moto

Mpo na nini ezali na ntina? Ntango tokutani na moto oyo asepeli, tolingaka kozongela ye na ngonga oyo akozala na ndako mpo tóbwaka mai na mboto ya solo oyo tolonaki. (1 Ko. 3:6) Mbala mingi, yango esɛngaka ete liboso tótika moto, tóbongisa nzela ya kozongela ye na koluka koyeba ntango nini tokozongela ye. Lisusu, ezalaka malamu kotikela moto motuna oyo tokotalela na mbala ya nsima oyo tokozongela ye. Kosala bongo ekosala ete moto azala na mposa ya kozela biso, mpe soki eyano ezali na mokanda oyo totikeli ye, akoki kotanga yango. Kobongisa nzela mpo na lisolo mosusu esalaka mpe ete bozongeli ezala pɛtɛɛ, mpo bosilaki kopona lisolo oyo bokosolola mpe moto yango akoyeba ndenge makambo ekoleka. Ntango tokozongela ye, tokoki koyebisa ye ete toyei mpo na koyanola na motuna oyo totunaki ye na mbala eleki mpe na nsima tokobanda lisolo.

Ndenge ya kosala yango:

Ntango ozali kobongisa maloba ya kobanda lisolo na mosala ya ndako na ndako, bongisá mpe motuna oyo okotuna moto mpo opesa ye eyano na mbala ya nsima. Motuna yango esengeli kouta na lisolo moko oyo elobelami na mokanda oyo tozali kokabola mokolo wana, to ekoki kozala motuna oyo eyano na yango ezali na moko ya mikanda oyo toyekolaka na bato, oyo tokoki kolakisa ye ntango tokozongela ye.
Na nsuka ya lisolo na yo na moto oyo asepeli, yebisá ye ete ozali na mposa ya kozongela ye lisusu mpe tuná ye motuna moko oyo obongisaki mpo ozongela ye. Na bateritware mosusu bato bazalaka na misala mingi mpe basepelaka mpenza te koyokana na biso mpo tózongela bango. Na makambo ya ndenge wana, okoki koloba boye: “Mbala mingi ozalaka na ndako na bangonga oyo? [Tiká ye apesa eyano.] Na mbala ya nsima, nakoya mpo na mwa miniti moke kopesa yo eyano na motuna oyo . . . Soki okozala na mosala ntango na koya, okoki koyebisa ngai.”
Soki oyebisi moto ete okozongela ye na ntango moko boye, kokisá elaka na yo. (Mat. 5:37) Na nsuka ya bozongeli na yo, bongisá nzela mpo ozongela ye lisusu.

Meká kosala boye na boumeli ya sanza:

Ntango ozali kobongisa maloba ya kobanda lisolo, bongisá mpe motuna oyo okotuna moto mpo opesa ye eyano na mbala ya nsima. Yebisá yango na basakoli mosusu oyo okei elongo na bango.