Tókolisa makoki na biso ya kosakola—Kolakisa ndenge boyekoli ya Biblia esalemaka na lisalisi ya buku Biblia eteyaka

Mpo na nini ezali na ntina: Ntango mosusu, bato mingi bakangaka ntina te ntango toyebisaka bango ete toyekolaka na bato Biblia ofele. Bakoki kokanisa ete ekosɛnga básangana na etuluku moko boye mpo na koyekola, to báyekola bango moko na nzela ya mikanda to Internet. Na esika ya kosɛnga kaka moto ete oyekola na ye, mpo na nini te kolakisa ye ndenge boyekoli esalemaka? Na mwa miniti moke, ntango mosusu liboso ya porte, okoki kolakisa moto ete ezali mpasi te koyekola Biblia mpe yango ekoki kosalisa ye ayeba makambo mingi.

Ndenge ya kosala yango:

Nsima ya kopesa mbote, tuná moto yango soki amitungisaka mpo na mikolo ezali koya.
Yebisá ye ete bato mingi mpe bamitungisaka ndenge wana, mpe lakisá ye etanda ya makambo ezali na kati ya buku Biblia eteyaka. Limbolá ete buku yango ezali na masolo oyo ezali pɛtɛɛ kokanga ntina, oyo emonisi oyo Biblia eteyaka mpo na mikolo ezali koya mpe makambo mosusu, mpe sɛngá ye apona mokapo oyo esepelisi ye.
Pesá ye buku mpe bófungola na mokapo oyo aponi. Limbolá ete biyano ya mituna oyo ezali na ebandeli ya mokapo ekozwama na baparagrafe oyo elandi.
Sɛngá moto yango atánga paragrafe ya liboso soki akosepela kosala yango. Na nsima, tángá motuna ya paragrafe yango mpe bótalela eyano elongo. Bótánga mpe bólobela bavɛrsɛ oyo esimbi eyano. Lakisá ye ndenge otye mokɔlɔtɔ na eyano na buku na yo.
Bótalela paragrafe elandi, kasi na mbala oyo, sɛngá ye ameka koyanola na maloba na ye moko.
Pesá ye longonya mpe bóyokana mpo ozongela ye mpo bósilisa liteya yango.
Soki ebongi, lakisá ye video Boyekoli ya Biblia esalemaka ndenge nini? oyo ezali na jw.org.

Meká kosala boye na boumeli ya sanza:

Bondelá Yehova apambola milende na yo mpo na kobanda koyekola na moto Biblia.—Flp. 2:13.
Meká kolakisa ndenge boyekoli ya Biblia esalemaka na lisalisi ya buku Biblia eteyaka, to lakisá video Boyekoli ya Biblia esalemaka ndenge nini? ata mbala moko ntango ozali na mosala ya kosakola.