Makambo oyo emonisi ete Nzambe oyo asalá biso alingaka biso

1. ABIMISAKA MOI

Soki moi ezali te, bomoi mpe ekozala te awa na mabele. Moi nde esalaka ete nzete epesa nkasa, fololo, mbuma, ndika mpe mboto. Moi mpe esalaka ete nzete ebenda mai kobanda na mosisa, ematisa yango tii na nkasa mpe ebimisa yango na mopɛpɛ.

2. ANOKISAKA MBULA

Mbula ezali likabo ya Nzambe mpo esalaka ete mabele ebotela biso biloko ya kolya. Nzambe apesi biso bambula uta na likoló mpe bileko ya kobota mbuma, azali kotondisa biso na biloko ya kolya mpe kotondisa mitema na biso na esengo.

3. APESAKA BISO BILEI MPE BILAMBA

Batata mingi basalaka makasi mpo na kolukela mabota na bango bilei mpe bilamba. Talá oyo Makomami elobi: “Bótala malamumalamu bandɛkɛ ya likoló, mpamba te balonaka te mpe babukaka te mpe bayanganisaka te na ndako ya kobomba biloko; nzokande Tata na bino ya likoló aleisaka bango. Bino boleki bango na motuya te?”​—Matai 6:25, 26.

“Bózwa liteya na fololo lísi ya esobe, ndenge yango ezali kokola . . . ; kasi nazali koloba na bino ete ata [Mokonzi] Salomo na nkembo na ye nyonso alataki lokola moko na yango te. Bongo soki Nzambe alatisaka matiti ya esobe . . . , akolatisa bino koleka te?”​—Matai 6:28-30.

Lokola Nzambe akoki kopesa biso bilei mpe bilamba, na ntembe te, akoki mpe kopesa biso biloko mosusu ya kobikela. Soki tozali kosala oyo Nzambe alingi, akoki kopambola bilanga na biso mpo ebota bilei mingi to akoki kosalisa biso tózwa mosala oyo ekopesa biso mbongo ya kosomba oyo tozali na yango mposa.​—Matai 6:32, 33.

Ya solo, soki totali moi, mbula, bandɛkɛ mpe bafolo, yango etindaka biso tólinga Nzambe. Lisolo oyo elandi ekolobela ndenge oyo Nzambe asololaki na bato.