Tókolisa makoki na biso ya kosakola​—Kopesa litatoli na nzela ya telefone

MPO NA NINI EZALI NA NTINA: Kopesa litatoli na nzela ya telefone ezali lolenge moko malamu ya “kopesa litatoli malamumalamu mpo na nsango malamu.” (Mis 20:24)a Esalisaka biso tópesa litatoli ata ntango tozali te na likoki ya kokutana na moto.

NDENGE YA KOSALA YANGO:

• 

  Omibongisa. Poná lisolo oyo ebongi. Na nsima, bongisá makambo oyo okoloba. Okoki mpe kobongisa mwa maloba ya mokuse oyo ezali komonisa mokano oyo obengi moto soki ayambi telefone te. Ekozala malamu ofanda na mesa mpo na kotya makambo oyo obongisi mpe bisaleli mosusu oyo okozala na yango mposa, na ndakisa aparɛyi oyo ezali ya kofungwama na JW Library^® to na jw.org^®

• 

  Zalá motema mpiɔ. Lobá ndenge omesaná koloba. Sɛkáká mwa moke mpe saláká bajɛstɛ lokola nde ozali komona moto yango. Kokata maloba mpambampamba te. Ekozala malamu ozala elongo na bandeko mosusu. Soki nkolo-ndako atuni motuna moko, lobá yango na mongongo makasi mpo ndeko oyo bozali na ye elongo akoka kosalisa yo mpo opesa eyano

• 

  Lobá likambo oyo ekopesa yo nzela ozongela moto yango. Soki moto yango asepeli, okoki kotikela ye motuna mpo oyanola ye na mbala ya nsima oyo okobenga ye. Okoki mpe kosɛnga ye otindela ye mokanda na adrɛsi e-mail na ye, to yo moko okende kotikela ye yango. To okoki kotindela ye moko ya bavideo na biso to masolo mosusu to kokomela ye mwa makambo mpo na yango. Soki emonani malamu, yebisá moto yango atala makambo mosusu oyo ezali na site Internet na biso