OMIPESA NA MOSALA YA KOSAKOLA | BAKISÁ ESENGO NA YO NA MOSALA YA KOSAKOLA
Salisá bato oyo oyekolaka na bango Biblia báyanganaka na makita
Makita ya lisangá ezali na esika monene na losambo ya pɛto. (Nz 22:22) Bato nyonso oyo basanganaka mpo na kosambela Yehova bazwaka esengo mpe mapamboli. (Nz 65:4) Mbala mingi bayekoli ya Biblia bakolaka mbangu soki bazali koyangana na makita mbala na mbala.
Ndenge nini okoki kosalisa bato oyo oyekolaka na bango Biblia báyanganaka na makita? Kolɛmba te kobengisaka bango na makita. Lakisá bango video Makambo esalemaka ndenge nini na Ndako ya Bokonzi? Limbwelá bango matomba oyo bakozwa soki bazali koyangana na makita. (lff liteya 10) Okoki kolobela likambo moko ya sikisiki oyo oyekolaki na makita to okoki koloba na mokuse makambo oyo bokoyekola na makita na mikolo ezali koya. Pesá bayekoli na yo ya Biblia mikanda oyo bokosalela na makita. Lisusu, pesá bango lisalisi oyo ebongi. Mbala mosusu okoki komema bango na motuka na yo to kokende kozwa bango na ndako na bango mpo báya na makita. Milende nyonso ozali kosala ekokende na mai te ntango moyekoli na yo moko akoya na makita mpo na mbala ya liboso.—1Ko 14:24, 25.
TALÁ VIDEO SALISÁ BATO OYO OYEKOLAKA NA BANGO BIBLIA BÁYANGANAKA NA MAKITA, MPE NA NSIMA YANOLÁ NA MITUNA OYO:
Libaku nini Neeta asalelaki mpo na kobengisa Rose na makita?
Mpo na nini toyokaka esengo ntango moyekoli na biso ya Biblia ayei na makita?
“Nzambe azali mpenza na kati na bino”
Nini ebendaki likebi ya Rose ntango ayangaki mpo na mbala ya liboso na makita?