Ndenge oyo mabondeli ekoki kosalisa yo

Pamela abɛlaki makasi mpenza mpe akendaki epai ya minganga. Kasi, abondelaki mpe Nzambe apesa ye makasi ya koyikela maladi na ye mpiko. Libondeli esalisaki ye?

Pamela alobi boye: “Ntango bazalaki kosalisa ngai na maladi na ngai ya kansɛr, mbala mingi, nazalaki kobanga mpenza. Kasi ntango nazalaki kobondela Yehova Nzambe, motema na ngai ezalaki kokita, nazalaki kobanga te mpe koyika mpiko. Tii lelo oyo nayokaka kaka mpasi, kasi libondeli esalisaka ngai nazala na makanisi ya malamu. Ntango bato batunaka ngai ndenge nazali koyoka, nalobaka ete, ‘nazali koyoka malamu te kasi nazali na esengo!’”

Na ntembe te, tokozela te tókutana na mokakatano moko ya makasi mpo tóbanda kobondela. Biso nyonso tokutanaka na mikakatano, ezala ya minene to ya mike, mpe mbala mingi, tozalaka na mposa básalisa biso mpo tóyikela yango mpiko. Libondeli ekoki kosalisa yo?

Biblia elobi: “Bwakelá Yehova ye moko mokumba na yo ya kilo, mpe ye moko akosunga yo. Akopesa nzela ata moke te ete moyengebene atengatenga.” (Nzembo 55:22) Maloba yango ezali kobɔndisa mpenza! Bongo ndenge nini libondeli ekoki kosalisa yo? Ntango ozali kobondela Nzambe na ndenge ya malamu, akopesa yo oyo osengeli na yango mpo na koyikela mikakatano na yo mpiko.—Talá etanda “Bolamu oyo mabondeli ekoki kopesa yo.”

Bolamu oyo mabondeli ekoki kopesa yo

Kimya ya makanisi

“Kosɛnga na bino eyebana epai ya Nzambe; mpe kimya ya Nzambe oyo eleki makanisi nyonso ekobatela mitema na bino mpe makanisi na bino na nzela ya Yesu Kristo.” (Bafilipi 4:6, 7) Ntango ozali koyebisa Nzambe mitungisi na yo, akosalisa yo ozala na kimya mpe ozwa bikateli ya malamu ntango ozali kotungisama.

Bwanya oyo euti na Nzambe

“Soki moko na bino azangi bwanya, akoba kosɛnga Nzambe, mpo ye apesaka bato nyonso na motema mobimba mpe apamelaka te; mpe akopesa ye yango.” (Yakobo 1:5) Ntango tozali kotungisama, mbala mingi, tozwaka bikateli ya malamu te. Soki tobondeli Nzambe apesa biso bwanya, akosalisa biso tókanisa ebele ya batoli oyo ekoki kosalisa biso, oyo ekomami na Liloba na ye, Biblia.

Makasi mpe libɔndisi

“Na makambo nyonso nazali na makasi na lisalisi ya moto oyo apesaka ngai nguya.” (Bafilipi 4:13) Lokola Yehova azali Nzambe oyo azali na nguya oyo eleki banguya nyonso, akoki kopesa yo makasi oyo esengeli mpo oyika mpiko to akoki kosunga yo na komekama oyo ozali kokutana na yango. (Yisaya 40:29) Biblia ebengi Yehova mpe “Nzambe ya kobɔndisama nyonso.” Akoki kobɔndisa biso “na kati ya bolɔzi na biso nyonso.”—2 Bakorinti 1:3, 4.

MABONDELI EKOKI KOSALISA YO?

Yehova atindaka biso na makasi te tóbondela ye. Kasi nde, asɛngi biso tóbondela ye. (Yirimia 29:11, 12) Bongo, okosala nini soki na kala, omonaki ete mabondeli na yo ezwaki biyano te? Kolɛmba nzoto te, kotika mpe te. Ntango mosusu, baboti oyo balingaka bana na bango basalisaka te bana yango na ndenge oyo balingi, to na ntango mpenza oyo bakanisi. Mbala mosusu, baboti bayebi ndenge ya malamu ya kosilisa likambo moko boye. Nzokande, mpo na koloba solo, baboti oyo balingaka bana na bango basalisaka bango.

Yehova Nzambe azali tata oyo alingaka bana na ye koleka batata nyonso, azali mpe na mposa ya kosalisa yo. Soki olandeli na likebi mpenza batoli oyo tolobeli, mpe osali nyonso osalela yango, Nzambe akoyanola na mabondeli na yo na ndenge ya malamu mpenza!—Nzembo 34:15; Matai 7:7-11.