Nasengeli kotika kotambwisa motuka?

Yo mpe okutani na likambo ya ndenge wana? Soki bongo, nini ekoki kosalisa yo oyeba soki osengeli kokoba kotambwisa motuka?

Na bamboka mosusu, soki moto akokisi mbula moko boye mpe alingi kozwa permis ya sika mpo na kotambwisa motuka, monganga nde asengeli kotalela ye to kopesa ye nzela. Bakristo oyo bafandi na bamboka yango basengeli kotosa mibeko yango mpe bikateli ya bakonzi ya mboka. (Rom. 13:1) Kasi, ata soki ofandi wapi, ezali na makambo oyo ekosalisa yo oyeba soki osengeli kokoba kotambwisa motuka.

TALÁ SOKI OSENGELI KOKOBA

Site Internet ya ebongiseli moko oyo etalelaka makambo ya mibange na États-Unis epesi likanisi ete okoki komituna mituna oyo elandi:

• Nazalaka na mokakatano ya komona bilembo oyo batyá na nzela to komona na butu?

• Nakokaka lisusu te kotala epai na epai, yango esalaka ete ezala mpasi mpo na ngai kotala batalatala ya motuka to kotala bisika oyo talatala elakisi te?

• Nakokaka te kosala makambo nokinoki, na ndakisa, kolongola lokolo na accélérateur mpo na konyata frein?

• Natambwisaka malɛmbɛ mpe yango esalaka ete nakangela mituka mosusu nzela?

• Nazalaki pene ya kosala aksida mbala ebele, mpe motuka ekómi matutumatutu mpo natutaki biloko?

• Bapolisi batɛlɛmisaki ngai mpo na ndenge na ngai ya kotambwisa?

• Esilá kokómela ngai nalala na volant?

• Namɛlaka bankisi oyo ekoki kosala ete natambwisa motuka malamu te?

• Bato ya libota to baninga basilá koyebisa ngai ete natika kotambwisa motuka?

Soki oyanoli ɛɛ na moko to mibale ya mituna yango, kanisá mwa bambongwana oyo okoki kosala. Na ndakisa, okoki kozwa ekateli ya kotambwisa motuka mingi te, mingimingi na butu. Taleláká likambo yango mbala na mbala. Okoki kosɛnga moto ya libota to moninga moko ayebisa yo ndenge oyo otambwisaka motuka. Okoki mpe kolanda mwa mateya na oyo etali kotambwisa motuka malamu. Kasi, soki oyanoli ɛɛ na mituna ebele, ekoki kozala malamu otika kotambwisa motuka.a

SALELÁ MITINDA YA BIBLIA

Mbala mosusu tozali kondima te ete makoki na biso ya kotambwisa motuka ezali kokita. Mpe ekoki kozala mpasi mpo moto ayebisa biso tótalela soki tosengeli kokoba to te. Na yango, mitinda nini ya Biblia ekoki kosalisa yo otalelaka likambo na yo na bokatikati mpe ozwa ekateli ya bwanya? Tótalela mitinda mibale.

Zalá na bopɔlɔ. (Mas. 11:2) Ntango tozali kokóma mibange, miso, matoi, makasi ya nzoto, mpe makoki mosusu ezalaka lisusu ndenge ezalaki liboso te. Na ndakisa, bato mosusu batikaka kobɛta masano mosusu ntango mbula ezali kopusana mpo bamoni ete lokola bakómi mibange, bakoki kozwa likama. Ezali mpe bongo mpo na kotambwisa motuka. Na ntango moko boye, moto oyo azali na bopɔlɔ akoki kozwa ekateli ya kotika kotambwisa motuka mpo na komibatela. (Mas. 22:3) Mpe soki bato mosusu bazali komitungisa mpo na ye, moto ya bopɔlɔ andimaka toli mpe ayokelaka bango.—Talá mpe 2 Samwele 21:​15-17.

Boyá komema ngambo ya makila. (Mib. 22:8) Motuka ekoki kobimisa makama soki bazali kotambwisa yango malamu te. Moto oyo azali kokoba kotambwisa motuka atako azali lisusu mokumbi ya malamu te akoki kotya bomoi na ye moko mpe ya basusu na likama. Mpe soki asali aksida mpe moto akufi, akoki komema ngambo ya makila.

Soki esɛngi ozwa ekateli ya kotika kotambwisa motuka, kokanisa te ete soki osali yango bato bakopesa yo lisusu lokumu te to valɛrɛ na yo ekokita. Yehova alingaka yo mpo ozali na bizaleli malamu, na ndakisa bopɔlɔ, komikitisa, mpe omibanzabanzaka mpo na bolamu ya basusu. Mpe alaki ete akosalisa mpe akobɔndisa yo. (Yis. 46:4) Akosundola yo ata moke te. Na yango, sɛngá ye asalisa yo mpo osalela bwanya ya Biblia mpe ozala na bososoli mpo na koyeba soki osengeli kotika kokumba motuka to te.