Mokanda ya Lisangani ya Mikóló-bakambi
LOKOLA tokómi pene ya kokɔta na ebongiseli ya makambo ya sika, sikoyo mpenza nde ntango ya kokoba kozela Yehova. (Sef. 3:8) Mosakoli Danyele alobaki boye: “Nzambe . . . akomɔnisaka makambo mabombami mpe ye ayebisi . . . makambo makobima na mikolo ya nsuka.” (Dan. 2:28) Tozali mpenza na libaku malamu ya kozala na bomoi na mikolo ya nsuka ya eleko yango oyo esakolamaki mpe kokanga ntina ya mabombami ya Yehova Nzambe oyo azali komonisa polele sikoyo!
Na nzela ya “moombo ya sembo mpe ya mayele,” Yehova amonisi mokemoke mokano na ye ya koyanganisa “ebele ya bato” na mokili mobimba, oyo bakosambela ye na “mikolo ya nsuka” oyo ya mpasi. (Mat. 24:45; Emon. 7:9; 2 Tim. 3:1) Na kotalela Yisaya 2:2, 3 koyanganisama yango ekosalema na mokili mobimba na “mikolo ya nsuka.” Mbula na mbula, bato bazali koyanganisama atako yikiyiki mpe mobulu etondi na mokili.
Na boumeli ya mobu 2004, bamonisaki biso mingi mpenza ntina ya kotosa maloba ya Yesu oyo ete: “Bókɛngɛlaka . . . bómilɛngɛla.” (Mat. 24:42, 44) Ya solo, makambo oyo ezali kobima na mokili ezali na ndimbola monene mpo na baklisto, oyo bayebi kotala “bilembo ya bantango” mpe bazali kolandela bilembo yango. (Mat. 16:1-3) Ndenge Liloba na ye emonisi yango, Yehova akokoba kozala elongo na ebongiseli na ye ya Teokrasi oyo esangisi basaleli na ye, ata soki bakutani na botɛmɛli ya ndenge nini.
Atako bato mosusu bazali kosala milende mpo na kopekisa to kosukisa kosakolama ya Bokonzi, bandeko na biso bazali kolanda koyebisa bato solo mpe koyangana elongo. (Mis. 5:19, 20; Ebe. 10:24, 25) Na ekólo Russie, na sanza ya Yuni 2004, tribinale moko ya Moscou endimaki ekateli oyo tribinale mosusu ya moke ezwaki mpo na kopekisa mosala ya Batatoli ya Yehova na Moscou mpe kolongola nkombo na bango na mikanda ya Leta. Kasi, bandeko babangaki te; bayebaki makambo oyo Nzambe azali kosɛnga epai na bango, mpe batosaki ye lokola azali Moyangeli na esika ya kotosa bato. (Mis. 5:29) Tondimi mpenza ete Yehova akotambwisa basaleli na ye ata soki bafundi bango na tribinale.
Na bambula oyo eleki, bandeko ya ekólo Géorgie babungisaki biloko na bango, bato ya mobulu banyokolaki bango, mpe bamonaki ndenge bato yango bazali kotumba mikanda na bango. Kasi, ata ebundeli moko te oyo esalemaki mpo na kotɛmɛla bango elongaki. (Yis. 54:17) Na boumeli ya mobu ya mosala 2004, mosala ya Batatoli ya Yehova endimamaki lisusu na Leta na ekólo Géorgie. Bandeko basalaki mayangani kozanga mobulu, mpe mikanda na biso ekómi kokɔta kozanga nkaka na ekólo yango. Motuya ya basakoli mpe ya bato oyo bayanganaki na Ekaniseli emataki.
Na ekólo Arménie, Érythrée, République de Corée, Rwanda, mpe Turkménistan, bandeko bakɔtaki bolɔkɔ mpo na kondima na bango. Atako bandeko yango banyokwamaki, bayebaki malamu makambo oyo Makomami elobi na ntina na minyoko na bango, yango esalisaki bango bátikala sembo mpe bázela Yehova asikola bango.—1 Pet. 1:6; 2 Pet. 2:9.
Soki otángi Lapolo ya mosala ya mobu 2004, na Linɔ́ngi ya Mosɛnzɛli ya 1 Febwali 2005, okosepela na komona ete Yehova azali malamu. (Nz. 31:19; 65:11) Tozali kolikya ete lapolo yango ekolendisa bino bókoba kotambola na ndenge oyo esepelisaka Nzambe.—1 Tes. 4:1.
Tozali kokoba kosala milende mingi mpo na koyebisa solo na bato ya ndenge nyonso. Na ndakisa, bakasɛti-video, ba DVD, mpe bisaleli mosusu na elobeli ya bikela, mpe mikanda ya ekomeli ya bato bakufá miso (braille), esili kobongisama mpo na kosalisa na elimo, bato oyo bakufá matoyi ná baoyo bakufá miso. Basakoli mingi ya Bokonzi basili koyekola minɔkɔ ya bapaya oyo bafandi na teritware ya lisangá na bango.
Longola yango, bituluku mingi esili kosalema na bateritware oyo ezalaka mpasi mpo na kokóma. Teritware ya filiale moko ezali na bituluku ya mosikamosika koleka 300, oyo ezali na basakoli koleka 7 000. Yango ezali mpenza komonisa ete masangá mingi ekosalema na mikolo ezali koya! Lisusu, kati na bato 16 760 607 oyo bayanganaki na Ekaniseli na mbula oyo eleki, bato koleka milio 10 bazali Batatoli te. Yango emonisi polele ete mbuma esili kotela, etikali kaka kobuka yango.
Tozali kotɔnda Yehova mpo na mapamboli na ye mpe na ndenge azali kosalisa biso na bolingo mpenza, mokolo na mokolo. (Mas. 10:22; Mki. 3:10; 1 Pet. 5:7) Lokola tozali kokende liboso mpe kosala na bomoko, na “mikolo ya nsuka” oyo, tozali kotya elikya na biso nyonso epai na Yehova. Atako mikakatano nini oyo tokoki kokutana na yango, tiká tóbatela na motema moko mokapo na biso ya mobu 2005: “Lisalisi na ngai ekouta epai ya Yehova.” (Nz. 121: 2, NW) Bóyeba ete tolingaka bino mpe tozali kobondela mpo na bino.
Bandeko na bino,
Lisangani ya Mikóló-Bakambi ya Batatoli ya Yehova